हरिश्चन्द्र बाग, कञ्चनपुर, १८ पुस । कञ्चनपुरको पुनर्वास स्थित डोकेबजार देखि बेलौरी-बेलडाँडी हुँदै वेदकोट स्थित दैजी जोड्ने हुलाकी राजमार्ग निर्माण गर्ने सम्झौता गरेका दुई निर्माण कम्पनीहरुले समयमै काम नगर्दा कालोपत्रेको काम अलपत्र परेको छ । कञ्चनपुरको दक्षिणी क्षेत्रको मेरुदण्डका रुपमा लिइएको डोकेबजार देखि बेलौरी-बेलडाँडी हुँदै दैजी जोड्ने बहुप्रतिक्षित हुलाकी राजमार्ग निर्माणका लागि २०७३ फागुनमा हुलाकी राजमार्ग योजना कार्यालयले दुईवटा निर्माण कम्पनीहरुसँग सम्झौता गरेको थियो ।
जम्मा ६२ किलोमिटर सडकखण्ड मध्ये डोकेबजारदेखि बेलौरीको बुटावारीसम्मको २० किलोमिटर र बेलडाँडीदेखि दैजीसम्मको २२ किलोमिटर सडकखण्ड शर्मा राजेन्द्र जेभी निर्माण कम्पनीलाई र बेलौरीको बुटावारीदेखि बेलडाँडी सम्मको २० किलोमिटर सडकखण्ड बाबाहंस सिद्धिशाही जेभी निर्माण कम्पनीलाई ३० महिनाभित्र कालोपत्रे गर्ने गरी ठेक्का दिइएको थियो । तर सम्झौता अवधि पछि पनि पटकपटक गरी दुईपटक थपिएको म्याद सकिँदा समेत दुवै निर्माण कम्पनीहरुले सडकखण्ड कालोपत्रेको काम पूरा गरेका छैनन् ।
दुवै निर्माण कम्पनीहरुले काममा ढिलासुस्ती र चरम लापरवाही गरिरहेका छन् । जसका कारण उक्त क्षेत्रका नागरिकहरुको जनजीवन नराम्ररी प्रभावित हुन पुगेको छ । निर्माण कम्पनीहरुले सम्झौता गरेको करीब चार वर्षसम्म पनि सडक कालोपत्रे नगरेका कारण दक्षिणी क्षेत्रका नागरिकहरु बर्षौँदेखि धुलाम्य कच्ची सडकमा जोखिमपुर्ण कष्टकर यात्रा गर्न बाध्य भएका छन् । सडक आसपासमा बसोबास गर्ने नागरिकहरु त्यही सडकबाट उडेर आएको धुलोले हैरान मात्रै छैनन् सडक दुर्घटनाको समेत त्यत्तिकै जोखिम मोलिरहेका छन् ।
बेलौरी क्षेत्रका केही जागरुक युवाहरुले त सडक कालोपत्रेको काम अलपत्र छोडेको भन्दै गत महिना चोकचोकमा ठेकेदारका तस्बीर अंकित पोष्टर टाँसेर रचनात्मक बिरोध समेत जनाएका थिए । हुलाकी राजमार्ग कालोपत्रेको काममा अत्यन्त ढिलासुस्ती, चरम लापर्वाही र निक्कै बेवास्ता भएको यहाँका नागरिकहरुको गुनासो छ । समयमै काम नगर्ने निर्माण कम्पनीको ठेक्का बदर गरी कालोसूचिमा राख्नुपर्ने र ठेकेदारहरुलाई जरिवाना सहित कारबाही गर्नुपर्ने स्थानीयको जोडदार माग रहेको छ ।
यद्यपि हुलाकी राजमार्ग योजना कार्यालय धनगढीका प्रमुख राम पुकार जैसवालले हुलाकी राजमार्गको ७० प्रतिशत काम सम्पन्न भएको जनाएका छन् । कोभिड १९ का कारण निर्माणको काम केही समय रोकिएकोले निर्माण कम्पनीहरुको म्याद थप गर्ने प्रक्रिया समेत अगाडि बढाइएको उनले जनाएका छन् । निर्माण कम्पनीहरुले जिम्मेवार ढंगबाट काममा तीब्रता दिन नसकेको बताउँदै उनले हुलाकी राजमार्ग योजना कार्यालय धनगढीबाट बारम्बार ताकेता गरेपछि निर्माण कम्पनी सम्पर्कमा आएको बताएका छन् ।
निर्माण कम्पनीहरुमध्ये शर्मा राजेन्द्र जेभी निर्माण कम्पनीका सञ्चालक भीम बहादुर साउँद र बाबाहंस सिद्धिशाही जेभी निर्माण कम्पनीका सञ्चालक दीपेन्द्र शाहीलाई पटक-पटक टेलिफोन गर्दा समेत फोन सम्पर्कमा जोडिन मानेका छैनन् । विकास निर्माणका कार्यका लागि ठाउँठाउँको ठेक्का लिने तर समयमै काम नगरी राज्य पक्षलाई कमजोर सावित गर्न खोज्ने निर्माण कम्पनीलाई कारबाहीको दायरामा ल्याउन सके विकास निर्माणको कामले तीब्रता पाउने देखिन्छ । यसतर्फ पनि सरोकारवाला निकायको ध्यान केन्द्रित हुन आवश्यक छ ।
