हरिश्चन्द्र बाग, कञ्चनपुर, २३ चैत्र । कञ्चनपुरको बेलौरी नगरपालिका वडा नम्बर ७ को वडा कार्यालयमा शनिबार एक दिवसीय निःशुल्क स्वास्थ्य शिविर आयोजना गरिएको छ । धनगढी सञ्जीवनी अस्पताल कैलालीको आयोजना र वडा कार्यालयको समन्वयमा सञ्चालित शिविरमा ४१० जनाले विशेषज्ञ चिकित्सकहरूद्वारा स्वास्थ्य परीक्षण तथा औषधिसहितको सेवा प्राप्त गर्नु भएको वडाध्यक्ष प्रकाश श्रेष्ठले जानकारी दिनुभयो । स्वास्थ्य सेवाको पहुँचबाहिर रहेका ग्रामीण क्षेत्रका नागरिकहरूलाई शिविरले राहत प्रदान गरेको छ । शिविरमा स्त्री रोग, हाड जोर्नी तथा नशा रोग, नाक कान घाँटी, जनरल फिजिसियन तथा ल्याप्रोस्कोपिक सर्जन लगायतका विशेषज्ञ चिकित्सकहरूले सेवा प्रदान गर्नु भएको थियो ।
"विभिन्न स्वास्थ्य सेवाहरूलाई सहज रूपमा नागरिकसम्म पुर्याउने उद्देश्यले आयोजना गरिएको उक्त शिविरमा ४१० जनाले सेवा लिनु भएको छ । स्त्री रोग, हाड जोर्नी, नाक कान घाँटी, जनरल फिजिसियन र सर्जनसहितका विशेषज्ञहरू यहाँ आउनु भएको थियो । यस्तो शिविरले हाम्रो वडामा स्वास्थ्य सचेतना फैलाउन र पहुँच बढाउन मद्दत गरेको छ।" यो भनाइ वडाध्यक्ष प्रकाश श्रेष्ठको हो ।
शिविरमा भिडियो एक्स–रे, सामान्य एक्स–रे, पिसाब परीक्षण, सामान्य जाँच, औषधि वितरण लगायतका सेवा प्रदान गरिएको थियो । धनगढी सञ्जीवनी अस्पतालका प्रबन्धक रविन उपाध्यायले भन्नुभयो, "स्थापनाकालदेखि नै हामीले ग्रामीण भेगमा निःशुल्क स्वास्थ्य शिविर गर्दै आएका छौँ । यस किसिमका शिविरले स्वास्थ्य सेवा नपुगेका समुदायमा सस्तो, सरल र सहज सेवा दिनका साथै स्वास्थ्य चेतना पनि फैलाउँछ । नि:शुल्क शिविरका अतिरिक्त उहाँहरू अस्पतालमै पुगेर सेवा लिन आउनु भयो भने पनि यही पर्चाका आधारमा केही छुट सुविधा दिने हामीले योजना बनाएका छौँ ।"
स्वास्थ्य शिविर उद्घाटन समारोहका प्रमुख अतिथि बेलौरी नगरपालिकाका नगर उपप्रमुख जोगराम चौधरीले यस्ता शिविरले जनस्वास्थ्यमा उल्लेखनीय योगदान पुर्याएको बताउनु भयो । बजेट अभावका कारण स्थानीय स्वास्थ्य संस्थामा विशेषज्ञ डाक्टर नियुक्त गर्न सकिएको नसकिए पनि यस प्रकारका शिविरहरूले नागरिकहरूलाई एकीकृत सेवा प्रदान गर्ने उहाँको विश्वास छ ।
विशिष्ट अतिथि हरेन्द्र सिंह बिष्टले भन्नुभयो, "शिक्षा र स्वास्थ्य क्षेत्र एक अर्कासँग गाँसिएका छन् । यस्तो स्वास्थ्य शिविरले जनतालाई राहत मात्र दिएको छैन, उहाँहरूको जीवनशैलीमा समेत सुधार ल्याउने विश्वास लिएको छु । यस्ता कार्यक्रमले समुदायमा स्वास्थ्यको विषयमा चेतना फैलाउने महत्त्वपूर्ण अवसर दिन्छ ।" कुण्डा सब-डिभिजन बन कार्यालयका प्रमुख दिनेश कुमार यादवले राज्यका संयन्त्रहरू सक्रिय भएर यस्ता कार्यक्रमहरूमा सहकार्य गर्नुपर्नेमा जोड दिनुभयो । उहाँले नागरिकसम्म सेवा पुर्याउने यस्ता अभियानलाई आवश्यक सहयोग गर्ने प्रतिबद्धता व्यक्त गर्नुभयो ।
लाभग्राही ज्येष्ठ नागरिक देशु चौधरी भन्नुहुन्छ, "हामीजस्ता गरिबलाई यस्तो सेवा धेरै उपयोगी छ । डाक्टरको जाँच र औषधि पनि पायौँ, अब सधैंजसो यस्तो शिविर भए हुने हो ।" अर्का लाभग्राही पन्न्यादेवी चौधरीले भन्नुभयो, "पहिले यस्तो सेवा लिन धनगढी, नेपालगन्ज वा भारतका सहरहरूमा जानुपर्थ्यो, आज भने घरमै सेवा पाइयो । हामी निकै खुशी छौँ ।" त्यस्तै, बन्ध्या चौधरीको अनुभव पनि उत्साहजनक थियो। उहाँले भन्नुभयो, "हामीजस्ता वृद्ध वृद्धालाई सहज भयो । धेरै राम्रो भयो, धन्यवाद दिन चाहन्छौँ ।" शिविर सफल पार्न सहयोग गर्ने सम्पूर्ण चिकित्सक, स्वास्थ्यकर्मी, सङ्घ–संस्था, स्वयंसेवक र स्थानीय जनप्रतिनिधिहरूप्रति वडा कार्यालयले आभार व्यक्त गरेको छ ।
ग्रामीण क्षेत्रका नागरिकहरूलाई सहज र पहुँचयुक्त सेवा दिनका लागि बेलौरीमा १५ शय्याको अस्पताल निर्माणाधीन अवस्थामा रहेको छ । यद्यपि निर्माण कम्पनीले समयमै काम नगर्दा तीन वर्षअघि नै शिलान्यास भएको अस्पतालको भवन अझै अधुरो छ । त्यसले राज्यको उदासीनता देखाउँछ । तत्काल सेवा दिन यस्ता शिविरहरू उपयोगी भए पनि दीर्घकालीन समाधानका लागि अस्पताल निर्माण र नीतिगत सुधार आवश्यक छ ।
