हरिश्चन्द्र बाग, कञ्चनपुर, ०६ फागुन । सुदूरपश्चिम प्रदेशको आर्थिक, औद्योगिक र पर्यटन प्रवर्द्धनका लागि कञ्चनपुरको महेन्द्रनगरस्थित खुला मञ्चमा यही फागुन १२ गतेदेखि प्रदेश स्तरीय औद्योगिक व्यापार मेला तथा कञ्चनपुर पर्यटन महोत्सव आयोजना हुन गइरहेको छ । कञ्चनपुर उद्योग वाणिज्य सङ्घको आयोजनामा भीमदत्त नगरपालिका-४ स्थित महेन्द्रनगर खुला मञ्चमा हुने महोत्सव १० दिनसम्म सञ्चालन हुने छ । महोत्सवबारे मंगलबार कञ्चनपुर उद्योग वाणिज्य सङ्घ महेन्द्रनगरमा पत्रकार सम्मेलन गरेर जानकारी गराइएको छ ।
कृषि, उत्पादन र स्वरोजगार प्रवर्द्धनमा जोड ।।
सोह्रौँ संस्करणको रूपमा आयोजना हुन लागेको उक्त महोत्सवको मुख्य नारा "कृषि, उत्पादन र स्वरोजगार; आर्थिक समृद्धिको आधार" रहेको छ । सङ्घका महासचिव खगेश्वर बोहराका अनुसार, कोरोना महामारीबाहेक अढाई दशकदेखि निरन्तर रूपमा यो महोत्सव आयोजना हुँदै आएको छ । साथै, सङ्घले यसअघि दुई पटक अन्तर्राष्ट्रिय ईण्डो-नेपाल व्यापार मेला आयोजना गरिसकेको र तेस्रो संस्करणको तयारी गरिरहेको छ ।
व्यापार, उद्योग, पर्यटन र मनोरञ्जनको सङ्गम ।।
महोत्सवमा ३०० भन्दा बढी स्टलहरू रहनेछन्, जसमा लघु उद्योग, कृषि, गार्मेन्ट, वैकल्पिक ऊर्जा, पर्यटन प्रवर्द्धन, उपभोग्य सामग्री, कृषि औजार, सूचना प्रविधि, विद्युतीय सामग्री, शिक्षा, स्वास्थ्य सेवा लगायतका उत्पादन तथा सेवाहरू प्रदर्शन गरिनेछन् । साथै बालबालिकाका लागि बाल उद्यान र विविध मनोरञ्जनात्मक कार्यक्रमहरू राखिनेछन् ।
थारु संस्कृति र खानाको विशेष प्रदर्शनी ।।
महोत्सवमा थारु समुदायको संस्कृति र खानाको विशेष प्रदर्शनी आकर्षणको केन्द्र बन्नेछ । "थारु गाउँ" नामक विशेष स्टलमा थारु समुदायको परम्परागत खाना, संस्कृति र कला प्रस्तुत गरिने बताइएको छ । साथै सुदूरपश्चिम प्रदेशको विविध सांस्कृतिक पहिचान झल्काउने कार्यक्रमहरू समेत आयोजना गरिने छन् ।
स्थानीय तथा राष्ट्रिय कलाकारहरूको प्रस्तुति ।।
महोत्सवमा स्थानीय तथा राष्ट्रिय कलाकारहरूको प्रस्तुति रहने बताइएको छ । भारतसँग सिमाना जोडिएको कारण भारतीय पर्यटकहरूको उल्लेखनीय सहभागिता रहने अनुमान गरिएको छ ।
लगानी प्रवर्द्धन र सामाजिक उत्तरदायित्व ।।
कञ्चनपुर उद्योग वाणिज्य सङ्घका अध्यक्ष पीताम्बर जोशीका अनुसार, महोत्सवले स्थानीय उत्पादन र सेवाको बजारीकरण गर्ने उद्देश्य राखेको छ । साथै यसबाट लगानीको अवसर सिर्जना गर्न तथा सहकारी, लघुवित्त, बैंकिङ्ग क्षेत्रका सेवा तथा सुविधाहरू प्रचार गर्ने लक्ष्य राखिएको छ ।
सामाजिक उत्तरदायित्व अन्तर्गत महोत्सवबाट सङ्कलित रकमको एक हिस्सा विभिन्न सामाजिक कार्यमा लगानी गरिने छ । प्रत्येक टिकट बिक्रीबाट २ रुपैयाँ भम्केनी धाममा नेपाल आमाको मूर्ति निर्माणका लागि, १ रुपैयाँ नेपाल पत्रकार महासङ्घ शाखा कञ्चनपुरको अक्षयकोष निर्माणका लागि र २ रुपैयाँ अन्य सामाजिक सेवाका लागि छुट्टाइएको छ ।
महोत्सवको व्यवस्थापन र सहभागिता ।।
महोत्सवलाई सफल बनाउन १५१ सदस्यीय मुख्य आयोजक समिति, १६ विषयगत समिति, स्टेरिङ समिति तथा सल्लाहकार समिति गठन गरिएको छ । महोत्सवको मुख्य प्रायोजक प्रभु बैङ्क र देउती सोप एण्ड केमिकल्स प्रा.लि. रहेका छन् । महोत्सवमा २ लाखभन्दा बढी दर्शकको उपस्थिति रहने अनुमान गरिएको छ भने ५ करोडभन्दा बढीको व्यापारिक कारोबार हुने अपेक्षा गरिएको छ । साथै सुदूरपश्चिमका कृषि तथा उद्योगीहरूलाई सम्बन्धित जिल्लाको वाणिज्य सङ्घबाट सिफारिस भएमा निःशुल्क स्टल प्रदान गरिने जानकारी गराइएको छ ।
उद्घाटन समारोहमा उच्चस्तरीय सहभागिता ।।
महोत्सवको उद्घाटन नेपाल सरकारका उद्योग, वाणिज्य तथा आपूर्ति मन्त्री दामोदर भण्डारीको प्रमुख आतिथ्यमा हुनेछ भने भारतको उत्तराखण्ड प्रदेशका पर्यटन, सांस्कृतिक एवं सिँचाई मन्त्री सतपाल महाराज विशिष्ट अतिथिको रूपमा रहने छन् । यस महोत्सवले सुदूरपश्चिम प्रदेशको आर्थिक, सांस्कृतिक तथा पर्यटन क्षेत्रको प्रवर्द्धनमा महत्त्वपूर्ण भूमिका खेल्ने अपेक्षा गरिएको छ ।
