दीर्घराज ओझा / हरिश्चन्द्र बाग, कञ्चनपुर, २८ माघ । कञ्चनपुरको पुनर्वास नगरपालिका-९ मा अवस्थित प्यारातालको पर्यटन प्रवर्द्धन तथा संरक्षणमा नागरिक समुदायको सक्रियता बढ्दै गएको छ । अग्रज पत्रकार तथा स्थानीय पर्यटन अभियन्ता दीपेन्द्र बस्नेतको अगुवाइमा स्थानीय नागरिकहरूले स्वतःस्फूर्त अभियान सञ्चालन गर्दै प्याराताल क्षेत्रको संरक्षण तथा पर्यटन विकासमा महत्त्वपूर्ण योगदान पुर्याइरहेका छन् ।
प्याराताल जैविक महत्वका साथै ऐतिहासिक र सांस्कृतिक धरोहरको रूपमा महत्त्वपूर्ण मानिन्छ । यसको संरक्षण तथा प्रवर्द्धनलाई ध्यानमा राख्दै स्थानीय नागरिकहरूले विभिन्न पहल गर्दै आएका छन् । अभियानअन्तर्गत प्याराताल क्षेत्रको सरसफाइ, वन तथा जैविक विविधताको संरक्षण, पदमार्ग निर्माण र पर्यटकीय प्रवर्द्धनका लागि प्रचार-प्रसार कार्यक्रमहरू सञ्चालन गरिएको छ । साथै प्यारातालको जैविक विविधता अध्ययन तथा संरक्षण गर्न वैज्ञानिक अध्ययनको थालनीसमेत गरिएको छ ।
स्थानीय पर्यटन समितिका अध्यक्ष दीपेन्द्र बस्नेत भन्छन्, "प्यारातालको प्राकृतिक सौन्दर्य उजागर गर्दै दिगो पर्यटन विकासका लागि स्थानीय समुदायको सक्रिय सहभागिता सुनिश्चित गर्न आवश्यक छ । हामी सबैको साझा प्रयासले मात्र प्याराताललाई देशकै प्रमुख पर्यटकीय गन्तव्यका रूपमा विकास गर्न सकिन्छ ।"
पर्यटन प्रवर्द्धनका लागि पुनर्वास नगरपालिकाले समेत सहयोग गरिरहेको बताइएको छ । हाल नगरपालिकाको सक्रियतामा प्यारातालको विस्तृत परियोजना प्रतिवेदन (डीपीआर) तयार पार्ने काम भइरहेको छ । यस योजनाअन्तर्गत पूर्वाधार विकास, पर्यटक-अनुकूल सुविधाहरूको विस्तार तथा जैविक विविधताको थप अध्ययन गर्ने लक्ष्य राखिएको छ ।
स्थानीय बासिन्दाहरूको उत्साह, सरकारी तथा निजी क्षेत्रको सहकार्य र दीर्घकालीन योजनाहरूको कार्यान्वयनले प्याराताललाई पर्यटकीय केन्द्रका रूपमा स्थापित गर्ने लक्ष्य राखिएको छ । आगामी दिनमा प्याराताललाई थप व्यवस्थित गर्दै आन्तरिक तथा बाह्य पर्यटक आकर्षित गर्न पूर्वाधार विकासलाई प्राथमिकता दिने योजना रहेको पर्यटन अभियान संयोजक बस्नेतले जानकारी गराए ।
स्थानीय समुदायको स्वतःस्फूर्त पहल, नगरपालिकाको सहयोग र पर्यटन समितिको निरन्तर प्रयासका कारण प्यारातालको पर्यटन सम्भावना उजागर हुँदै गएको छ । यदि यो अभियान यथावत् रूपमा अघि बढाइयो भने निकट भविष्यमा प्याराताल कञ्चनपुरको मात्र नभई नेपालकै प्रमुख पर्यटकीय गन्तव्यका रूपमा स्थापित हुन सक्ने सम्भावना रहेको विज्ञहरूले बताएका छन् ।
