विकास सिंह महता, कञ्चनपुर, १७ माघ । कञ्चनपुरको लालझाडीमा तेस्रो अध्यक्ष कप फुटबल प्रतियोगिता सञ्चालन गरिएको छ । "हाम्रो सामूहिक गोल, लागू पदार्थ दुर्व्यसनको अन्त्य" भन्ने मूल नारासहित लालझाडी गाउँ खेलकुद समितिको आयोजनामा प्रतियोगिता सञ्चालन गरिएको हो । बुधबारदेखि इटाहा चारपाते युवा क्लब देखतभुलीको खेलमैदानमा प्रतियोगिता जारी छ ।
लालझाडी गाउँ खेलकुद समितिका अध्यक्ष प्रकाश रानाको सभापतित्वमा प्रतियोगिताको उद्घाटन गरिएको हो । त्यस क्रममा अध्यक्ष रानाले लालझाडी गाउँ खेलकुद समितिले फुटबल मात्र नभई अन्य खेलकुद विकासका लागि पनि सक्रिय भूमिका निर्वाह गरिरहेको दाबी गर्नुभयो । आगामी दिनमा आवश्यक बजेटको व्यवस्था गर्न पालिकासँग अनुरोध गर्दै उहाँले प्रतियोगिताका मुख्य प्रायोजक, सह-प्रायोजक तथा सहयोगी दाताहरूप्रति हार्दिक कृतज्ञता ज्ञापन गर्नुभयो ।
उद्घाटन समारोहका प्रमुख अतिथि लालझाडी गाउँपालिका अध्यक्ष निर्मल रानाले सामाजिक एकताको सन्देश प्रवाह गर्ने खालका प्रतियोगिताको आवश्यकता औँल्याउँदै खेलकुदले युवाहरूको क्षमता अभिवृद्धि गर्नुका साथै स्वास्थ्य सुरक्षामा पनि महत्त्वपूर्ण भूमिका खेल्ने बताउनु भयो । उहाँले खेलकुदको विकासका लागि गाउँपालिकाले आगामी वर्ष विशेष बजेट विनियोजन गर्ने प्रतिबद्धता व्यक्त गर्दै इटाहा चारपाते युवा क्लबलगायत सहयोगी हातहरूलाई धन्यवाद ज्ञापन गर्नुभयो ।
लालझाडी गाउँपालिका वडा नं. ५ का वडाध्यक्ष पहलबहादुर थापाले स्वागत मन्तव्य राख्दै खेलाडीहरूले अनुशासित रूपमा खेल खेल्दै प्रतियोगिताको गरिमा बढाउने विश्वास व्यक्त गर्नुभयो । साथै, प्रतियोगिताको आयोजना तथा प्रायोजनमा सहयोग गर्ने सम्पूर्ण संस्थाहरूप्रति आभार व्यक्त गर्नुभएको छ । प्रतियोगिताका सदस्य सचिव हेमन्त रानाका अनुसार खेलकुदको विकासका लागि पालिकाले निरन्तर साथ दिने प्रतिबद्धता व्यक्त गरेको छ ।
प्रतियोगितामा युवा तर्फ २० टिम र भेट्रान तर्फ ८ टिम सहभागी छन् । च्याम्पियन टिमले रु. १,२१,१२१ नगद, ट्रफी, प्रमाणपत्र र मेडल पाउने छ । उपविजेता टिमले रु. ७१,१७१ नगद, ट्रफी, प्रमाणपत्र र मेडलमा चित्त बुझाउनुपर्ने छ । विभिन्न विधाका उत्कृष्ट खेलाडीहरूलाई आकर्षक पुरस्कार प्रदान गरिने बताइएको छ । भेट्रान तर्फ प्रथम स्थान प्राप्त टिमले रु. ११,१११ नगद, खसी, ट्रफी, प्रमाणपत्र र मेडल प्राप्त गर्ने छ । उपविजेता टिमलाई खसी, ट्रफी, प्रमाणपत्र र मेडल प्रदान गरिने छ । प्रतियोगितामा लालझाडी गाउँपालिका मुख्य प्रवर्द्धक रहेको छ भने इटाहा चारपाते युवा क्लब र लालझाडी गाउँपालिका वडा नं. ५ कार्यालयले समन्वयात्मक सहयोग पुर्याएका छन् ।
उद्घाटनकै क्रममा लालझाडी गाउँपालिकाका कर्मचारी-जनप्रतिनिधि र लालझाडी गाउँ खेलकुद समितिबिच भएको मैत्रीपूर्ण खेलमा खेलकुद समितिले ३–० गोल अन्तरले जित निकालेको थियो । उद्घाटन खेलमा लालझाडी–२ कञ्ज र न्यु प्रगतिशील युवा क्लबले प्रतिस्पर्धा गरे । जसमा लालझाडी–२ कञ्जले ४–० को फराकिलो जित निकाल्दै उत्कृष्ट सुरुआत गर्यो । सो खेलमा लालझाडी–२ कञ्जका जर्सी नम्बर ११ का नवीन थापा म्यान अफ द म्याच घोषित भए ।
प्रतियोगिताको खेल तालिका अनुसार माघ १७ गते (दोस्रो दिन) हुने खेलहरू :
पहिलो खेल: लालझाडी–५ (पहिलो) vs बेलडाँडी गाउँपालिका–१ (दिउँसो १:०० बजे)
दोस्रो खेल: लालझाडी–५ (निलो) vs लालझाडी–६ (चानदेव) (दिउँसो ३:०० बजे)
पहिलो खेल: लालझाडी–४ vs कृष्णपुर नगरपालिका–२ (बिहान ११:०० बजे)
