कञ्चनपुर, ३० भदौ । कञ्चनपुरको लालझाडी गाउँपालिकामा सार्वजनिक सुनुवाइ कार्यक्रम गरिएको । आइतबार गाउँपालिकाको आयोजना र बेलौरी अनलाइन खबर प्रा.लि. को सहजीकरणमा सार्वजनिक सुनुवाइ कार्यक्रम गरिएको हो ।सार्वजनिक सुनुवाइ कार्यक्रममा गत आर्थिक वर्ष ०८०।०८१को वार्षिक प्रगति प्रतिवेदन प्रस्तुत गर्दै लालझाडी गाउँपालिका प्रमुख प्रशासकीय अधिकृत राज बहादुर सार्कीले गाउँपालिकाले लिएको लक्ष्य भन्दा आन्तरिक आम्दानीमा वृद्धि भएको बताउनुभयो । नदीजन्य पदार्थमा ठेक्का लगाउँदा आन्तरिक आयमा पनि वृद्धि भएर १ करोड २९ लाख रुपैयाँ सङ्कलन भएको उहाँले बताउनुभयो ।
प्रमुख प्रशासकीय अधिकृत सार्कीले ८२.८९ प्रतिशत वित्तीय प्रगति भएको बताउनु भयो । कुल ४४ करोड ५० लाख बजेटबाट झण्डै ३७ करोड ५ लाख खर्च भएको उहाँले जानकारी दिनुभयो । प्रमुख प्रशासकीय अधिकृत र गाउँपालिका अध्यक्षबिच कार्यसम्पादन सम्झौता अनुरूप वित्तीय प्रगति पनि भएको बताउनु भयो । न्यूनतम स्रोत साधनका बिच अधिकतम काम गर्नुपर्ने बाध्यता रहेको भन्दै त्यसका बाबजुद पनि सुशासनदेखि विकास निर्माणका योजना सन्तोषजनक रूपमा सम्पन्न भएको उहाँको भनाइ छ ।
कार्यक्रममा नागरिकले सोधेका प्रश्नको जवाफ दिँदै लालझाडी गाउँपालिका अध्यक्ष निर्मल रानाले स्थानीय सरकार सञ्चालन ऐन ०७४ अनुरूप पालिकाबाट विभिन्न विकास निर्माणका कामकाज अघि बढाइएको बताउनुभयो । सडक, तटबन्ध, कृषि, शिक्षा, स्वास्थ्य लगायतका सामाजिक वृद्धि विकासमा क्षेत्रमा काम भइरहेको उहाँको भनाइ छ । सामुदायिक वनले पालिकालाई बुझाउनु पर्ने नियमानुसारको रकम भुक्तानीमा आनाकानी हुँदै आएकोले त्यसमा कडाइ गरिने अध्यक्ष रानाको स्पष्टोक्ति छ ।
कार्यक्रममा लालझाडी गाउँपालिकाका उपाध्यक्ष सपना चौधरी रानाले स्वागत मन्तव्य राख्दै आफ्नो क्षेत्राधिकार भित्र पर्ने काममा भइरहेका प्रगति र योजना बारेमा प्रकाश पार्नुभयो । कार्यक्रममा जनसहभागिता नै न्यून भएकाले आगामी दिनमा नागरिकको उपस्थिति वृद्धिमा जोड दिँदै सहभागी स्थानीय नागरिकहरूले गाउँपालिकाले सडक, कृषि, पर्यटनको वृद्धि विकासका कार्यक्रम ल्याउनु पर्ने र जनजीविकाका सवालमा केन्द्रित हुनुपर्नेमा जोड दिनु भएको छ । बेलौरी अनलाइनका सञ्चालक माधव पौडेल र पत्रकार नवराज अवस्थीले कार्यक्रमको सहजीकरण गर्नु भएको थियो । उक्त कार्यक्रममा जनप्रतिनिधि, राजनीतिक दलका प्रतिनिधि, पालिकाका कर्मचारी, पत्रकार र स्थानीयको सहभागिता रहेको थियो ।
