धर्मराज कठायत, कञ्चनपुर, २९ जेठ । वर्षेनी महाकाली नदीले कटान, डुबान र बाढी पहिरो जस्ता क्षति गर्ने गरेकोले यसबाट हुने क्षति कम गर्ने उद्देश्यले जल तथा मौसम विज्ञान विभागले भीमदत्त नगरपालिकाका जनप्रतिनिधि र कर्मचारीहरूसँग कार्यशाला गोष्ठी सम्पन्न गरेको छ । विभागले सम्भावित मौसमको वास्तविक अवस्थाको अध्ययन गरेर पूर्वानुमान गर्ने र सम्प्रेषण गर्ने कामको थालनी गर्न लागेको हो । प्रभावमा आधारित पूर्वानुमान नेपालमा विगत तीन चार वर्षदेखि हालसम्म जम्मा चार वटा जिल्लामा लागू भएको छ । यस वर्ष पानी र गर्मी दुवै सरदर भन्दा बढ्ने पूर्वानुमान आइरहेकोले २०७८ सालमा आएको विपद् जस्तो आउन सक्ने पूर्वानुमान रहेको हुँदा यस विषयलाई गम्भीर रूपमा लिनुपर्ने इन्स्टिच्युट अफ हिमालयन रिस्क रिडक्सनका कार्यकारी निर्देशक सुरज गौतमले बताउनु भयो ।
जल तथा मौसम विज्ञान विभागले प्रभावमा आधारित पूर्वानुमानको सूचना पालिका स्तरमा पठाइसके पछि प्रभावित समुदायमा त्यो सूचना कसरी पुर्याउने भन्ने बारे छलफल भएको जल तथा मौसम विज्ञान विभाग कार्यालय भैरहवाका कार्यालय प्रमुख वरुण पौडेलले बताउनु भयो । त्यसै गरी कार्यशाला गोष्ठीमा भीमदत्त नगरपालिका वडा नम्बर १८ का वडाध्यक्ष रवीन्द्र देवकोटाले विपद्को विषयलाई सामान्य तरिकाले हेर्न नहुने भन्दै त्यसबाट हुने क्षतिले विकराल स्थिति ल्याउन सक्ने हुँदा अब ल्याइने विकासका योजनामा विपद्ले असर नपुर्याउने गरी योजना छुट्याएर जान जरुरी रहेको बताउनु भयो ।
त्यसै गरी भीमदत्त नगरपालिकाका प्रशासकीय अधिकृत सुभाष अधिकारीले प्रभावमा आधारित पूर्वानुमान अति महत्त्वपूर्ण विषय रहेको भन्दै भीमदत्त नगरपालिकाले जल तथा मौसम विज्ञान विभागले पठाउने सूचनालाई प्रभावित समुदाय वा क्षेत्रमा पुर्याई त्यसबाट हुनसक्ने क्षति र प्रभावको बारेमा आङ्कलन गर्न सके यसबाट जनजीवन सहज हुने सुझाव दिनुभयो । अन्य वर्षको तुलनामा यस वर्ष वर्षा बढी हुने पूर्वानुमान भएकोले सरकारवालासँग सहकार्य गरी मानवीय क्षति हुनु पूर्व यसलाई कम गर्ने कार्य महत्त्वपूर्ण रहेको भीमदत्त नगरपालिका वडा नम्बर १२ का वडाध्यक्ष भूपेन्द्र रावलको भनाइ रहेको छ ।
जल तथा मौसम विज्ञान विभागले प्रभावमा आधारित पूर्वानुमानले गर्ने कार्यले बाढीको उच्च जोखिममा रहेका वडाहरूलाई पूर्व तयारी, सम्भावित क्षति तथा विपद्को सामना गर्न ठूलो सहयोग पुग्ने वन, वातावरण, विपद् तथा फोहोर महिला व्यवस्थापन समितिका संयोजक प्रकाश थापाको विश्वास रहेको छ । प्रभावमा आधारित पूर्वानुमान सम्बन्धी कार्यशाला गोष्ठीमा भीमदत्त नगरपालिकाका नगर प्रमुख पदम बोगटी, उपप्रमुख निलम लेखक जोशी, प्रमुख प्रशासकीय अधिकृत महेश बम, वडाध्यक्षहरू, विभिन्न शाखाका प्रमुख, इन्स्टिच्युट अफ हिमालयन रिस्क रिडक्सनका पूर्व सूचना विज्ञ दिनानाथ भण्डारी र मौसमविद् मनीषा केसी लगायत एनएनएसडब्लुएका कर्मचारीहरूको उपस्थिति रहेको थियो । कार्यक्रमको सहजीकरण भीमदत्त नगरपालिकाका विपद् सम्पर्क व्यक्ति मनोज भट्टले गर्नुभएको थियो ।
