धर्मराज कठायत, कञ्चनपुर । महिला, बालबालिका तथा ज्येष्ठ नागरिक मन्त्री भगवती चौधरीले बाढीको उच्च जोखिममा रहेको कुतियाकवर क्षेत्रको अवलोकन गर्नु भएको छ । मन्त्री चौधरीले शनिबार कञ्चनपुरको दोधाराचाँदनी नगरपालिका वडा नम्बर १० स्थित बाढीको उच्च जोखिममा रहेको कुतियाकवर क्षेत्रमा मन्त्रालयका सचिव सहितको टोली लिएर अनुगमन गर्नु भएको हो ।
बर्सेनि कटान र डुबानको क्षति बेहोर्दै आएको कुतियाकवर समुदायमा बाढी नियन्त्रण तथा समुदायको उत्थानशीलताको क्षेत्रमा गैरसरकारी संस्था निड्स नेपालले विगत लामो समय देखि सम्पन्न गरेका र हालसम्म सञ्चालन रहेका क्रियाकलापहरूको विषयमा मन्त्री चौधरीले अवलोकन गर्नु भएको बताइएको छ । कुतियाकवर समुदाय बर्सेनि कटान र डुबानको सन्दर्भमा अत्यधिक जोखिममा रहेको समुदाय हो । सोही क्षेत्रको अवलोकनपछि मन्त्री चौधरीले बाढीको उच्च जोखिम भएको हुँदा नदीले गर्ने कटान र डुबान नियन्त्रण तथा तटबन्ध निर्माणका लागि सानो बजेटले नहुने भन्दै मन्त्रालय गएर मन्त्रालयगत रूपमा छलफल अगाडि बढाउने प्रतिबद्धता जाहेर गर्नुभएको छ ।
निड्स नेपालका कार्यकारी निर्देशक भवराज रेग्मीले महाकाली नदीको पानीको सदुपयोग र बाढीको जोखिमबाट कसरी बच्ने भन्ने उद्देश्यले काम गर्दै आएको भन्दै महिला सशक्तीकरण केन्द्र सञ्चालन गरी महिलाहरूलाई सशक्त बनाई समुदायलाई उत्थानशीलता बनाउने यसको मुख्य उद्देश्य रहेको बताउनु भयो । कुतियाकवर समुदाय महाकाली र जोगबुडा नदीले घेरिएको मात्र नभई भारतीय दशगजा सीमा नजिकै छ । विगतदेखि अहिलेसम्म यस समुदायले विभिन्न समस्याको सामना गदै आएको छ । करिब ४२ घरपरिवार रहेको यो समुदायका बासिन्दाहरूको आम्दानीको श्रोत कृषि भएकाले बर्सेनि बर्सातमा त्यो पनि कटान र डुबानले क्षति गर्दा राज्य प्रति आशा देखाइरहेका छन् ।
मन्त्री चौधरीसँगै महिला, बालबालिका तथा सामाजिक विकास समितिका पूर्व सभापति निरूदेवी पाल, महिला, बालबालिका तथा ज्येष्ठ नागरिक मन्त्रालयका उपसचिव विनोद दाहाल, समाज कल्याण परिषद्का सदस्य सचिव मनोज भट्ट, कोषाध्यक्ष विनय लामा, बाल अधिकार परिषद्का उपाध्यक्ष बम बहादुर बानिया, सदस्य सचिव इन्द्रा देवी ढकाल, दोधाराचाँदनी नगरपालिकाका नगर प्रमुख किशोर कुमार लिम्बु, नगर उपप्रमुख गङ्गादेवी जोशी र अक्सफामका प्रतिनिधि खगेन्द्र धिमाल लगायतको सहभागिता रहेको थियो ।
