धन बहादुर बोहरा, बाजुरा, १० जेठ । बाजुराको कोल्टीमा रहेको जनप्रकाश माविका विद्यार्थी रारा शैक्षिक भ्रमणका लागी हिँडेको जिप खत्याडमा दुर्घटना भएको छ । बिहीबार मुगुको खत्याड गाउँपालिका वडा नं. २ जाम हिलटपमा जिप दुर्घटना हुँदा १४ जना घाइते भएका छन् । मुगु जिल्लामा रहेको रारा ताल भ्रमणको लागि हिँडेको ग १ ज ८२४९ नम्बरको जिप दुर्घटना भएको जिल्ला प्रहरी कार्यालय मुगुले जनाएको छ ।
कोल्टीमा रहेको जनप्रकाश माध्यमिक विद्यालयका कक्षा १० मा अध्ययनरत विद्यार्थीहरू शैक्षिक भ्रमण रारा जान लागेको जिप दुर्घटना हुँदा शिक्षक र विद्यार्थी घाइते भएका छन् । घाइते हुनेमा विद्यार्थी शर्मिला साहानी, लक्ष्मी रोकाया, प्रियङ्का गिरी, ज्योति रोकाया, दीपिका रावत, विमला विष्ट, निशा दमाई, पशुपति बोहरा, करुणा महत, सुरज शाही, रेजिना कार्की, शिक्षिका सुशीला गिरी, निर्मला भण्डारी र जिप चालक लाल बहादुर भण्डारी गरी ११ जना विद्यार्थी, २ जना शिक्षिका र १ जिप चालक सहित सवार रहेको थिए ।
जिप दुर्घटना भई करिब ३० मिटर तल खसेको थियो । घाइते विद्यार्थी, शिक्षिका र चालकको खत्याड गाउँपालिका प्राथमिक स्वास्थ्य केन्द्र रातापानीमा उपचार भइरहेको छ । घाइते सबैको अवस्था मध्यम रहेको छ । घाइतेहरूको हात, खुट्टा, टाउको, ढाड लगायत शरीरका विभिन्न भागमा चोट लागेको जनप्रकाश माविका प्रधानाध्यापक अनोज राज गिरीले बताउनु भएको छ ।