कञ्चनपुर, २७ पुस । कञ्चनपुरको कृष्णपुर नगरपालिकामा सञ्चालित नगरस्तरीय १४ औँ राष्ट्रपति रनिङ्ग शिल्ड छनोटको उपाधि समैजी माविले हात पारेको छ । शुक्रबार कृष्ण मावि गुलरियाको प्राङ्गणमा सम्पन्न छनोट प्रतियोगिताको उपाधि दोस्रो पटक समैजी माविले जितेको हो । कृष्ण मावि गुलरियाकै प्राङ्गणमा अघिल्लो वर्ष सम्पन्न १३ औँ राष्ट्रपति रनिङ्ग शिल्ड छनोटको उपाधि पनि समैजी माविले नै जितेको थियो । कृष्णपुर नगरपालिकाको आयोजनामा पुस २४ गतेदेखि सुरु भएको १४औँ राष्ट्रपति रनिङ्ग शिल्ड छनोट प्रतियोगितामा सहभागी २५ विद्यालयलाई पछि पार्दै समैजीले यस पटक पनि उपाधि हात पारेको हो ।
समैजी ६ स्वर्ण, ४ रजत र ७ कांस्य गरी जम्मा १७ पदकका साथ प्रथम भएको हो । त्यस्तै सनलाइट बोर्डिङ स्कुल ५ स्वर्ण, ६ रजत र ५ कांस्य गरी जम्मा १६ पदकका साथ दोस्रो भएको छ भने ५ स्वर्ण पदक सहित डाइमण्ड इङ्लिस बोर्डिङ स्कुल तृतीय भएको छ । छनोट प्रतियोगितामा प्रथम, द्वितीय र तृतीय स्थान हासिल गर्ने विद्यालयहरूलाई प्रतियोगिता मूल आयोजक समितिका संयोजक एवं कृष्णपुर नगरपालिकाका नगर प्रमुख हेमराज ओझाले एक औपचारिक कार्यक्रमका बिच पुरस्कार तथा शिल्ड प्रदान गर्नुभएको छ । नगरस्तरीय छनोट प्रतियोगितामा नगरभरिका १३ सामुदायिक र १२ संस्थागत गरी २५ विद्यालयको सहभागिता रहेको थियो ।
समापन समारोहमा बोल्दै १४ औँ राष्ट्रपति रनिङ्ग शिल्ड छनोट प्रतियोगितामा मूल आयोजक समितिका संयोजक एवं कृष्णपुर नगरपालिकाका नगरप्रमुख हेमराज ओझाले कृष्णपुर नगरपालिकाले खेलकुदलाई उच्च प्राथमिकतामा राखेर काम गरिरहेको बताउनु भयो । उहाँले राष्ट्रपति रनिङ्ग शिल्डमा सहभागी नभएका खेलहरू क्रिकेट र फुटबललाई मेयर कपको रूपमा छिट्टै सञ्चालन गरिने समेत जानकारी दिनुभयो । खेलकुदको प्रारम्भ बिन्दु नै विद्यालय भएको भन्दै नगर प्रमुख ओझाले आगामी राष्ट्रपति रनिङ्ग शिल्डलाई थप व्यवस्थित तथा गुणस्तरीय तरिकाले सञ्चालन गर्ने गरी काम गर्ने प्रतिबद्धता व्यक्त गर्नुभयो ।
यसै वर्ष १४ औँ राष्ट्रपति रनिङ्ग शिल्ड जिल्ला स्तरीय छनोट प्रतियोगिता पनि कृष्णपुर नगरपालिकामै आयोजना हुने भएकोले त्यसका लागि पनि भोलिदेखि नै नगरपालिकाको टिमले तयारी थाल्ने नगरप्रमुख ओझाको भनाइ छ । नगरप्रमुख हेमराज ओझाको अध्यक्षतामा सम्पन्न १४ औँ राष्ट्रपति रनिङ्ग शिल्ड छनोट प्रतियोगिताको प्रमुख अतिथि राष्ट्रिय भूमि आयोग कञ्चनपुरका जिल्ला सदस्य दिल बहादुर देउवा रहनु भएको थियो भने वडा नम्बर ३ का वडाध्यक्ष खेम चौधरी, वडा नम्बर ४ का अध्यक्ष धर्म बहादुर सिंह, विभिन्न विद्यालयका प्रधानाध्यापक, शिक्षक, विद्यार्थी, अभिभावक र उल्लेख्य मात्रामा खेलप्रेमीहरूको उपस्थिति रहेको थियो ।
