धर्मराज कठायत, कञ्चनपुर, ०३ पुस । द्वन्द्वपीडित तथा एकल महिला विकास केन्द्रले ‘सामुदायिक सुरक्षा जालो’ कार्यक्रमको समीक्षात्मक बैठक गरेको छ । जिल्ला प्रशासन कार्यालय कञ्चनपुरको सभा कक्षमा मंगलबार कार्यक्रम गरिएको हो । द्वन्द्वपीडित तथा एकल महिला विकास केन्द्र कञ्चनपुरको आयोजना र नागरिक आवाज धापाखेल ललितपुरको आर्थिक सहयोगमा सन् २०२३ जनवरीदेखि ‘सामुदायिक सुरक्षा जालो’ कार्यक्रम सञ्चालन गरिएको बताइएको छ । संस्थाकी अध्यक्ष सिता बोहराले संस्थाका गतिविधिबारे प्रकाश पार्नु भयो ।
२०२३ जनवरी महिनादेखि कञ्चनपुर जिल्लाको भीमदत्त नगरपालिका र दोधाराचाँदनी नगरपालिकामा सञ्चालन गरिएको 'सामुदायिक सुरक्षा जालो’ कार्यक्रम अन्तर्गत द्वन्द्वपीडित तथा एकल महिला विकास केन्द्र र नागरिक आवाजको सहकार्यमा थुप्रै सामाजिक क्षेत्रमा देखिएका समस्या समाधान, रोकथाम तथा न्यूनीकरणका लागि गरिएका कामको कार्य प्रगति विवरण कार्यक्रममा प्रस्तुत गरिएको थियो । एक वर्षभरमा विपद् व्यवस्थापन सम्बन्धी तालिम, आत्महत्या रोकथाम, मनोसामाजिक परामर्श सम्बन्धी अभिमुखीकरण, स्वास्थ्य सुरक्षा हेरचाह सम्बन्धी कार्यक्रम, तनावबाट मुक्तिका लागि जनचेतना, जीविकोपार्जनका लागि एकल महिला र गरिबलाई सहयोग, जाजरकोट र बझाङका भूकम्प पीडितलाई खाद्यान्न सहयोग लगायतका कार्य गरिएको अध्यक्ष सिता बोहराले बताउनु भयो
उक्त कार्यक्रममा बोल्दै प्रमुख अतिथि जिल्ला समन्वय समिति कञ्चनपुरका प्रमुख दुर्गा दत्त बोहराले संस्थाले गरेको सामाजिक कार्यप्रति उच्च प्रशंसा गर्नुभयो । महिला सशक्तीकरणका सवालदेखि अन्य फराकिलो सामाजिक रूपान्तरणमा संस्थाले खेलिरहेको भूमिका उदाहरणीय रहेको उहाँको भनाइ छ । यस्तै कार्यक्रमका विशिष्ट अतिथि वेदकोट नगरपालिकाका उपप्रमुख तुलसी देवी जोशीले आगामी दिनमा समेत 'सामुदायिक सुरक्षा जालो’ कार्यक्रम सञ्चालनका लागि उहाँले अनुरोध गर्नुभयो ।
कार्यक्रममा जिल्ला प्रहरी कार्यालय कञ्चनपुरका प्रमुख प्रहरी उपरीक्षक कमल थापाले एकल महिलाको सशक्तीकरण, सामाजिक न्याय र अन्य सवालमा संस्थाले पुर्याएको योगदानको प्रशंसा गर्नुभयो । उहाँले सामाजिक विकृति, विसङ्गति न्यूनीकरणका सवालमा संस्थासँग हातेमालो गर्न कञ्चनपुर प्रहरी तयार रहेको समेत बताउनु भएको छ । कार्यक्रममा कञ्चनपुरका प्रमुख जिल्ला अधिकारी गोपाल कुमार अधिकारी सहित सुरक्षा निकायका प्रतिनिधि, जनप्रतिनिधि, नागरिक समाजका प्रतिनिधि, पत्रकार तथा संस्थाका पदाधिकारी एवं सदस्यहरूको समेत सहभागिता रहेको थियो ।
