हरिश्चन्द्र बाग, कञ्चनपुर, २० भदौ । मानव बेचबिखन विरुद्धको सोह्रौँ राष्ट्रिय दिवस सोमबार कञ्चनपुरमा पनि विभिन्न चेतनामुलक कार्यक्रमको आयोजना गरी मनाइदै छ । शान्ति पुनर्स्थापना गृहको आयोजना तथा मानव बेचबिखन विरुद्ध अभियान सञ्चालन गरिरहेका विभिन्न सामाजिक संघसंस्थाहरूको ऐक्यबद्धतामा सोमबार उक्त दिवस मनाइएको हो । मानव बेचबिखनबाट जोगाउन चाल्नुपर्ने कदम र सचेतना, बेचबिखनमा परेका मानवको उद्दार लगायतका विषयमा चेतनामुलक कार्यक्रम गरिएको बताइएको छ । 
यसै क्रममा कञ्चनपुरको बेलौरीमा मानव बेचविखन तथा ओसारपसार नियन्त्रणको लागि संगठित संस्था शान्ति पुनर्स्थापना गृह, नेपाल प्रहरी, सशस्त्र प्रहरी बल, पालिकाको महिला तथा बालबालिका शाखा, शिक्षण संस्थाहरू महाकाली मावि र शारदा माविका शिक्षक तथा विद्यार्थीहरू, मानव बेचबिखन तथा ओसारपसार बिरुद्धको क्षेत्रमा कार्यरत संस्थाका प्रतिनिधिहरू र राष्ट्रिय तथा स्थानीय छापा र विद्युतीय सञ्चारमाध्यममा कार्यरत सञ्चारकर्मीहरूको उपस्थितिमा बेलौरी बजार परिक्रमा गरी महाकाली माविको प्रांगणमा कोणसभा गरी मनाइएको छ । 
कोणसभामा महाकाली मावि व्यवस्थापन समितिका अध्यक्ष प्रेमसिंह बोहरा, महाकाली माविका प्रधानाध्यापक रमेशसिंह भण्डारी, शारदा माविका शिक्षिका जयन्ती पन्त, इलाका प्रहरी कार्यालयका प्रहरी निरीक्षक दानसिंह भण्डारी, सञ्चारकर्मीहरूको प्रतिनिधित्व गर्दै पत्रकार हरिश्चन्द्र बाग र बास नेपालका प्रतिनिधि नवराज अवस्थीले मानव बेचबिखन तथा ओसारपसारका सन्दर्भमा चेतनामूलक वक्तव्य राख्नु भएको थियोे । उक्त सभामा मानव बेचबिखन तथा ओसारपसारको पछिल्लो अवस्था र शान्ति पुनर्स्थापना गृहले गरिरहेका क्रियाकलापका बारेमा शान्ति पुनर्स्थापना गृह सम्पर्क कार्यालय बेलौरीका प्रतिनिधि नितु बिष्टले प्रकाश पार्दै कार्यक्रमको सहजीकरण गर्नुभएको थियो । उहाँका अनुसार, सोमबार साँझ बेलौरी बजार स्थित भीमदत्त चोकमा दीप प्रज्वलन गर्ने कार्यक्रम समेत तय गरिएको छ । 
के हो मानव बेचबिखन तथा ओसारपसार ?
मानव बेचबिखन तथा ओसारपसार एक बहुआयामिक, बहुक्षेत्रगत एवं विश्वव्यापी समस्या हो । यसलाई जघन्य अपराधको रुपमा लिईन्छ र नेपाल पनि यस समस्याबाट अछुतो छैन । कुनै न कुनै रुपमा शोषण गर्ने वा नाफा कमाउने उद्देश्यले प्रलोभनमा पारी, झुक्याई, डरत्रास देखाई कुनै पनि व्यक्तिलाई उसको इच्छा विपरित जबरजस्ती कुनै पनि कार्य गर्न बाध्य तुल्याइने अवस्थालाई मानव बेचविखन भनिन्छ । सन् २००२ मा काठमाडौंमा सम्पन्न सार्कको एघारौँ शिखर सम्मेलनबाट पारित “महिला तथा बालबालिका बेचबिखन विरुद्धको सार्क महासन्धि, २००२” लाई वि.सं. २०६३ भदौ २० गतेका दिन तत्कालीन व्यवस्थापिका संसदबाट अनुमोदन भएपछि सोही दिनको स्मरणमा २०६४ सालदेखि प्रत्येक वर्ष भदौ २० गतेका दिन यो दिवस मनाउन लागिएको हो ।
