कञ्चनपुर, १८ चैत्र । सूचनाको हकका लागि राष्ट्रिय महासंघ कञ्चनपुर शाखाको प्रथम अधिवेशन सम्पन्न भएको छ । सूचनाको हकका लागि राष्ट्रिय महासंघ कञ्चनपुर शाखा तदर्थ समितिका संयोजक हरिश्चन्द्र बागको अध्यक्षतामा शुक्रबार भीमदत्त नगरपालिकाको सभा हलमा आयोजित प्रथम अधिवेशनलाई सम्बोधन गर्दै प्रमुख अतिथि समेत रहनु भएका सूचनाको हकका लागि राष्ट्रिय महासंघका केन्द्रीय अध्यक्ष उमिद बागचन्दले सूचनाको हकलाई कार्यान्वयन गर्न, थप बलियो बनाउन, नागरिक मैत्री बनाउन र कानुनी व्यवस्थाको कार्यान्वयन गर्न महासंघले कार्य गर्ने बताउनु भयो । सार्वजनिक निकाय र नागरिकलाई जिम्मेवार र जबाफदेही बनाउन महासंघले सघाउने र नागरिकले पाउनु पर्ने सूचनाको हकलाई कार्यान्वयन गराउन सेवाग्राही र सेवा प्रदायकबिच मध्यस्थकर्ताको भूमिका निर्वाह गर्नु महासंघको मुख्य उद्देश्य रहेको उहाँको भनाइ छ ।
अधिवेशनलाई सम्बोधन गर्दै भीमदत्त नगरपालिकाका सूचना अधिकारी हरिसिंह धामीले सार्वजनिक निकायको कार्यसम्पादन चुस्त दुरुस्त बनाउन र नागरिकलाई समेत जिम्मेवार बनाउन महासंघले सहयोग पुर्याउने विश्वास व्यक्त गर्नुभयो । कार्यक्रममा नेपाल पत्रकार महासंघ कञ्चनपुर शाखाका सचिव राजेन्द्र अवस्थी, जिल्ला प्रहरी कार्यालय कञ्चनपुरका प्रहरी निरीक्षक यक्षराज जोशी, गैरसरकारी संस्था महासंघका सचिव अमिर तिरुवा लगायतले शुभकामना व्यक्त गर्नु भयो । सूचनाको हकका लागि राष्ट्रिय महासंघ सुदूरपश्चिम प्रदेश समितिका अध्यक्ष प्रेम ढुङ्गानाले सूचनाको हक र महासंघको भूमिकाका विषयमा प्रकाश पार्नुभयो । कार्यक्रमको सहजीकरण सूचनाको हकका लागि राष्ट्रिय महासंघ सुदूरपश्चिम प्रदेश समितिका सचिव नीराजन परियारले गर्नुभएको थियो ।
हरिश्चन्द्र बागको अध्यक्षतामा कञ्चनपुर शाखा ।।
सूचनाको हकका लागि राष्ट्रिय महासंघ कञ्चनपुर शाखाको प्रथम अधिवेशनले हरिश्चन्द्र बागलाई अध्यक्षमा सर्वसम्मत चयन गरेको छ । मनोज भट्टको संयोजकत्वमा रहेको ३ सदस्यीय निर्वाचन मण्डलले हरिश्चन्द्र बागको अध्यक्षतामा कञ्चनपुर शाखा घोषणा गरेको हो । कञ्चनपुर शाखाको उपाध्यक्षमा धर्मा रोकाया, सचिवमा देवेन्द्र खड्का, सहसचिवमा निर्मला सुनार, कोषाध्यक्षमा खडक कोली र सदस्यमा शङ्कर दत्त अवस्थीलाई चयन गरिएको छ । जिल्ला सदस्य समेत रहने गरी पालिका संयोजकहरूमा अर्जुन बहादुर सिंह (शुक्लाफाँटा नगरपालिका), राजेन्द्र बिष्ट (भीमदत्त नगरपालिका), गोकुल जोशी (वेदकोट नगरपालिका), पप्पु गुरुङ (दोधारा चाँदनी नगरपालिका), विकास सिंह महता (बेलडाँडी गाउँपालिका), माधव पौडेल (बेलौरी नगरपालिका), किशोर कुमार तामाङ (पुनर्वास नगरपालिका), गौरव बिष्ट (कृष्णपुर नगरपालिका) र पहिलाद राना (लालझाडी गाउँपालिका) चयन हुनु भएको छ । त्यस्तै, प्रदेश प्रतिनिधिहरूमा भाष्कर केसी, धन बहादुर बोहरा (डिबि) र ऐश्वर्या कुँवर तथा केन्द्रीय प्रतिनिधिहरूमा अम्बादत्त तिवारी, धनञ्जय अवस्थी, कुन्दन पाण्डेय र देवराज बडूलाई सर्वसम्मत चयन गरिएको छ ।
