हरिश्चन्द्र बाग, कञ्चनपुर, २१ मङ्सिर । निजी क्षेत्रका उद्योग तथा व्यवसायहरूलाई चलायमान बनाउन सरकार र निजी क्षेत्र मिलेर योजना बनाउनु पर्नेमा सरोकारवालाहरूको जोड रहेको छ । कञ्चनपुर उद्योग वाणिज्य संघको ३१ औँ वार्षिक साधारण सभालाई सम्बोधन गर्ने वक्ताहरूले कोभिड १९ को महामारीले पारेको प्रभावबाट थलिएको उद्योग तथा व्यवसाय क्षेत्रलाई माथि उकास्न केन्द्रित हुनुपर्ने धारणा राख्नु भएको हो । सुदूरपश्चिम प्रदेश सरकारका आर्थिक मामिला मन्त्री तारा लामा तामाङले निजी क्षेत्रसँगै समन्वय र सहकार्य गरेर प्रदेश सरकारका थुप्रै गतिविधि गरिरहेको बताउनु भएको छ । उहाँले निजी क्षेत्रका उद्योग व्यवसायलाई माथि उकास्न प्रदेश सरकारले योजना बनाएरै अगाडि बढ्ने प्रतिबद्धता जनाउनु भयो ।
त्यस्तै, नेपाल उद्योग वाणिज्य महासंघका पूर्व केन्द्रीय अध्यक्ष चण्डीराज ढकालले सरकारी निकायले उपेक्षा गरेका गतिविधिहरूमा निजी क्षेत्रले ठुलो योगदान पुर्याएको चर्चा गर्दै त्यसको निरन्तरताका लागि समेत जोड दिनुभयो । पछिल्लो दुई वर्षयता विश्वव्यापी महामारीका रूपमा फैलिएको कोरोनाको प्रभावले थला परेका उद्योग व्यवसायलाई चलायमान बनाउन सरकार र निजी क्षेत्र मिलेर योजना बनाउनु पर्नेमा नेपाल उद्योग वाणिज्य महासंघका केन्द्रीय पूर्व वरिष्ठ उपाध्यक्ष भाष्करराज राजकर्णिकारले जोड दिनु भएको छ । उहाँले नयाँ नयाँ भेरिअन्टको कोभिड भाइरस भित्रिरहँदा सरकार र निजी क्षेत्रको नेतृत्व गर्ने निकाय मौन रहेको आरोप लगाउनु भयो । उहाँले सरकारको निकम्मापनका विरुद्ध सक्रिय हुनु पर्ने नेपाल उद्योग वाणिज्य महासंघको अहिलेको नेतृत्व पनि स्वयं निष्क्रिय रहेकोमा आक्रोश पोख्नु भयो ।
विश्व मानव सभ्यताकै चुनौतीपूर्ण कालखण्डका रूपमा कोभिड १९ बाट सृजित परिस्थिति नेपालको परिपक्ष्यमा निजी लगानीकर्ता उद्यमी व्यवसायीहरूका लागि त झन् निक्कै अप्ठ्यारो र जोखिमपूर्ण समय रहेको उहाँको भनाइ छ । सुदूरपश्चिम प्रदेशलाई लामो समयसम्म पछाडि पारिएको उल्लेख गर्दै राजकर्णिकारले अब भने नयाँ सम्भावना र अवसर रहेको बताउनु भयो । कञ्चनपुर उद्योग वाणिज्य संघका अध्यक्ष जङ्ग बहादुर मल्लको सभाध्यक्षतामा सोमबार आयोजित समुद्घाटन समारोहमा विभिन्न क्षेत्रका व्यक्ति तथा संघसंस्थाहरूलाई योगदान पुर्याए बापत सम्मान तथा कदर गरिएको छ । त्यस्तै, कञ्चनपुर उद्योग वाणिज्य संघले प्रत्येक वर्ष प्रदान गर्दै आएको कञ्चनपुर आर्थिक पत्रकारिता पुरस्कार-२०७८ बाट टिभी टुडेका सुदूरपश्चिम समाचार संयोजक राजेन्द्र बिष्ट सम्मानित हुनु भएको छ ।
समुद्घाटन समारोहमा नेपाल उद्योग वाणिज्य महासंघका केन्द्रीय सदस्य पुष्पराज कुँवर, कञ्चनपुर उद्योग वाणिज्य संघका पूर्व अध्यक्ष माधव प्रसाद भट्ट, कञ्चनपुरका प्रमुख जिल्ला अधिकारी राम प्रसाद पाण्डे, सुरक्षा निकाय, राजनीतिक दल, वित्तीय संस्था, सञ्चारमाध्यम र विभिन्न संघसंस्थाका प्रमुख एवं प्रतिनिधिहरूका साथै उद्योगी व्यवसायीहरूको उपस्थिति रहेको संघका महासचिव वासुदेव जोशीले बताउनु भयो । समुद्घाटन समारोहका सहभागीहरूलाई संघका अध्यक्ष जङ्ग बहादुर मल्लले स्वागत गर्नु भएको थियो भने संघका वरिष्ठ उपाध्यक्ष पीताम्बर जोशीले धन्यवाद ज्ञापन गर्नु भएको थियो । सोमबार नै सम्पन्न बन्द सत्रबाट कोरोनासँग जुध्न र ब्याज मिनाहाका लागि सम्बन्धित निकायसँग समन्वय र सहकार्य गर्ने, ब्रह्मदेव क्षेत्रलाई धार्मिक नाकाका रूपमा अगाडि सार्ने, संघका भौतिक संरचनाहरूको स्तरोन्नति गर्ने लगायतका प्रस्तावहरू पारित गरिएको अध्यक्ष मल्लले जानकारी दिनुभयो ।
