हरिश्चन्द्र बाग, कञ्चनपुर, ०१ कार्तिक ।
कञ्चनपुर र कैलाली सहित सुदूरपश्चिमका अधिकांश क्षेत्रमा आइतबार साँझदेखि परिरहेको अविरल वर्षाले जनजीवन प्रभावित भएको छ । अकस्मात् मौसम परिवर्तन हुँदा धान खेती भित्र्याउन काटेर राखेको धान र काट्न बाँकी धानबाली खेतमै नोक्सान भएको कृषकहरूले जनाएका छन् ।
भित्र्याउनका लागि काटेर खेतमा सुकाइएको धानबाली एक्कासि परेको वर्षाले खेतमा डुबानमा परी नष्ट भएको बेलौरीका कृषक माधवी बिष्टले बताउनु भयो । अर्का कृषक श्याम रिजालले धानबाली सहित उखु तथा तोरी समेत खेतमै डुबानमा परेको र कृषकहरू निक्कै ठुलो मर्कामा परेको हुँदा सरकारले राहत प्याकेज ल्याउनुपर्ने माग गर्नुभयो ।
त्यस्तै, चाडपर्व मनाउन घरपरिवार तथा आफन्तजन कहाँ आवतजावत गर्ने नागरिकहरूले समेत असहज परिस्थिति सृजना भएको गुनासो गरेका छन् । यसका अतिरिक्त प्रतिकुल मौसमका कारण ठाउँ ठाउँमा विद्युतीय सेवा समेत अवरुद्ध भएको छ । नदि तथा खोलानालाहरूमा समेत पानीको बहाव बढिरहेकोले आम जनसमुदायलाई सतर्क रहन प्रशासनले अनुरोध गरेको छ ।
यसैबीच, सुदूरपश्चिम प्रदेश सरकारले अविरल वर्षाका कारण प्रभावित नागरिकहरू प्रति सहानुभूति प्रकट गरेको छ । बेमौसमी अविरल वर्षाका कारण सुदूरपश्चिम प्रदेशका विभिन्न स्थानमा पहिरो, डुवान, नदि कटानका कारण जनजीवन अस्तव्यस्त भएको प्रति प्रदेश सरकारले ध्यानाकर्षण भएको जनाएको छ । सुदूरपश्चिम प्रदेश सरकारका प्रवक्ता समेत रहनु भएका आन्तरिक मामिला तथा कानुन मन्त्री पूर्णा जोशीले विपदमा नागरिकहरुको साथ, सहयोगको लागि सबैमा अपील गर्नु भएको छ ।
"सडक अवरुद्ध भएर यात्रुहरु गन्तव्यमा पुग्न सकिरहनु भएको छैन, किसानहरुले दु:ख गरेर लगाएको बाली भित्र्याउन पाउनु भएको छैन । यी सबै कामको व्यवस्थापनमा स्थानीय प्रशासन, सुरक्षा निकाय गम्भीरताका साथ लागेको छ । प्रदेश सरकार समन्वयमा लागिरहेको छ ।" मन्त्री जोशीले भन्नुभयो । उहाँले अगाडि थप्नु भयो, "एकाबिहानैदेखि भासु भीरको पहिरो हटाउने काम लगायत विपदको व्यवस्थापनमा लागेको छु । एकदम डरलाग्दो तरिकाले पानी परिरहेको छ । सुरक्षा निकाय अत्यन्तै संवेदनशील भएर लागिरहेको छ। मानवीय क्षति नहोस् भन्ने कामना छ ।" जल तथा मौसम विज्ञान विभागले सोमबार बिहान जारी गरेको मौसम सम्बन्धी पूर्वानुमान यस्तो छ । (जारी मिति: २०७८/०७/०१ विहान ६:०० बजे )
मौसम विश्लेषण (Meteorological Analysis)
हाल बंगालको खाडिमा र मध्य भारतमा रहेका (उत्तरतिर सर्दै गरेको) न्यून चापिय प्रणालीहरु र पश्चिमी वायु प्रणालीको संयुक्त प्रभाव नेपालमा रहेको छ।
हाल मौसमको अवस्था (Present Weather Status)
हाल देशको अधिकांश भू-भागमा सामान्य बदली रहि सुदुरपश्चिम, कर्णाली, लुम्बिनी र गण्डकी प्रदेशका केही स्थानहरुमा र बाकी प्रदेशका एक- दुई स्थानहरूमा मेघ गर्जन/चट्याङ्ग सहित हल्का देखि मध्यम वर्षा भईरहेको छ। सुदुरपश्चिम प्रदेशको एक-दुई स्थानमा भारी वर्षा समेत भइरहेको छ।
आगामी तीन दिनको मौसम पूर्वानुमान
२०७८ कार्तिक ०१ गते (सोमबार)
दिउँसो: देशभर सामान्य देखि पूर्ण बदली रहने छ। सुदूरपश्चिम प्रदेश, कर्णाली प्रदेश, गण्डकी प्रदेश र लुम्बिनी प्रदेशका धेरै स्थानहरुमा साथै प्रदेश १, प्रदेश २ र बागमती प्रदेशका केहि स्थानहरु मेघगर्जन/चट्याङ्ग सहित हल्का देखि मध्यम वर्षाको सम्भावना रहेको छ । देशका पश्चिमी उच्च पहाडी तथा हिमाली भूभागहरुका थोरै स्थानहरुमा हल्का देखि मध्यम र वाकी हिमाली भूभागहरुका थोरै स्थानहरुमा हल्का हिमपातको समेत सम्भावना छ । प्रदेश १, प्रदेश २, लुम्बिनी, कर्णाली र सुदूरपश्चिम प्रदेशका एक-दुई स्थानमा भारी वर्षाको समेत सम्भावना रहेको छ ।
राती: देशभर सामान्य देखि पूर्ण बदली रहने छ। सुदूरपश्चिम प्रदेश, कर्णाली प्रदेश, गण्डकी प्रदेशका र लुम्बिनी प्रदेशका धेरै स्थानहरुमा साथै प्रदेश १, प्रदेश नं २ र बागमती प्रदेशका केही स्थानहरूमा मेघगर्जन/चट्याङ्ग सहित हल्का देखि मध्यम वर्षाको सम्भावना रहेको छ । देशका पश्चिमी र मध्य उच्च पहाडी तथा हिमाली भूभागहरुका केही स्थानहरुमा हल्का देखि मध्यम र वाकी हिमाली भूभागहरुका थोरै स्थानहरुमा हल्का हिमपातको समेत सम्भावना छ । प्रदेश १, प्रदेश २, लुम्बिनी, कर्णाली र सुदूरपश्चिम प्रदेशका थोरै स्थानहरूमा भारी वर्षाको समेत सम्भावना रहेको छ। सुदूरपश्चिम प्रदेशको एक-दुई स्थानमा धेरै भारी वर्षाको पनि सम्भावाना छ।
२०७८ कार्तिक ०२ गते (मंगलवार)
दिउँसो: देशभर सामान्य देखि पूर्ण बदली रहने छ। सुदूरपश्चिम प्रदेश, कर्णाली प्रदेश, गण्डकी प्रदेश र लुम्बिनी प्रदेशका धेरै स्थानहरुमा साथै प्रदेश १ र बागमती प्रदेशका केहि स्थानहरु तथा प्रदेश न २ का थोरै स्थानहरुमा मेघगर्जन/चट्याङ्ग सहित हल्का देखि मध्यम वर्षाको सम्भावना रहेको छ । देशका उच्च पहाडी तथा हिमाली भूभागहरुका केहि स्थानहरुमा हल्का देखि मध्यम हिमपातको समेत सम्भावना छ । सुदूरपश्चिम प्रदेशका केही र प्रदेश १, लुम्विनी, कर्णाली प्रदेशका थोरै स्थानहरूमा भारी वर्षाको समेत सम्भावना रहेको छ।
राती: देशभर सामान्य देखि पूर्ण बदली रहने छ। देशका धेरै स्थानहरूमा हल्का देखि मध्यम वर्षाको सम्भावना रहेको छ । देशका उच्च पहाडी तथा हिमाली भूभागहरुका थोरै स्थानहरुमा हल्का देखि मध्यम हिमपातको समेत सम्भावना छ । प्रदेश १ र लुम्विनी प्रदेशका थोरै स्थानहरू गण्डकी, कर्णाली र सुदूरपश्चिम प्रदेशका एक-दुई स्थानमा मेघगर्जन/चट्याङ्ग भारी वर्षाको समेत सम्भावना रहेको छ।
२०७८ कार्तिक ०३ गते (बुधवार)
दिउँसो: देशभर सामान्य देखि पूर्ण बदली रहने छ। प्रदेश १, प्रदेश नं २, बागमती, गण्डकी र लुम्बिनी प्रदेशका धेरै स्थानहरुमा साथै बाकी प्रदेशका थोरै स्थानहरुमा मेघगर्जन/चट्याङ्ग सहित हल्का देखि मध्यम वर्षाको सम्भावना रहेको छ । देशका उच्च पहाडी तथा हिमाली भूभागहरुका केहि स्थानहरुमा हल्का देखि मध्यम हिमपातको समेत सम्भावना छ । प्रदेश १, प्रदेश नं २, बागमती, गण्डकी र लुम्विनी प्रदेशका थोरै स्थानहरूमा भारी वर्षाको समेत सम्भावना रहेको छ।
राती: देशभर सामान्य बदली रहने छ। प्रदेश १, प्रदेश नं २, बागमती, गण्डकी र लुम्बिनी प्रदेशका थोरै स्थानहरुमा साथै बाकी प्रदेशका एक-दुई स्थानहरुमा मेघगर्जन/चट्याङ्ग सहित हल्का देखि मध्यम वर्षाको सम्भावना रहेको छ । देशका उच्च पहाडी तथा हिमाली भूभागहरुका थोरै स्थानहरुमा हल्का देखि मध्यम हिमपातको समेत सम्भावना छ ।
आगामी २४ घण्टाका लागि चेतावनी तथा परामर्श (Warning/Advisory for next 24 hours)
सुदूरपश्चिम प्रदेश, कर्णाली प्रदेश, गण्डकी प्रदेश र लुम्बिनी प्रदेशका धेरै स्थानहरुमा साथै प्रदेश १, प्रदेश २ र बागमती प्रदेशका केही स्थानहरुमा मेघगर्जन/चट्याङ्ग सहित हल्का देखि मध्यम वर्षाको सम्भावना रहेको छ। प्रदेश १, प्रदेश २, लुम्बिनी, कर्णाली र सुदूरपश्चिम प्रदेशका थोरै स्थानहरूमा भारी वर्षा र सुदूरपश्चिम प्रदेशको एक-दुई स्थानमा धेरै भारी वर्षाको समेत सम्भावना रहेकोले आवश्यक सतर्कता अपनाउनु हुन अनुरोध छ।
