हरिश्चन्द्र बाग, कञ्चनपुर, १७ साउन । विश्वभर फैलिँदै गइरहेको नयाँ भेरिअन्ट सहितको कोभिड १९ को सङ्क्रमण रोकथाम, नियन्त्रण, निदान तथा उपचारका लागि कञ्चनपुर जिल्लामा बैशाख १६ गतेदेखि जारी गरिएको निषेधाज्ञाको समय पुनः २ हप्ता थप गरी साउन मसान्तसम्म कायम गरिएको छ । जिल्ला कोभिड व्यवस्थापन केन्द्रको आइतबार बसेको बैठकबाट गरिएका निर्णयको आधारमा कोभिड १९ सङ्कट व्यवस्थापन अध्यादेश २०७८ को दफा ५ को उपदफा २ एवं स्थानीय प्रशासन ऐन २०२८ को दफा ६ को उपदफा ३ को अधिकार प्रयोग गरी साउन ३२ गते राति १२ बजेसम्म खुकुलो निषेधाज्ञाको समय थप गरिएको कञ्चनपुरका प्रमुख जिल्ला अधिकारी राम प्रसाद पाण्डेले जानकारी दिनुभयो ।
उहाँका अनुसार कुनै पनि सभा, सम्मेलन, सङ्ग्रहालय, सिनेमा हल, पार्टी प्यालेस, स्विमिङ पुल, मनोरञ्जन स्थल, सैलुन, ब्युटी पार्लर, दोहोरी रेष्टुरेन्ट, जिमखाना, दर्शक सहितका खेलकुद लगायतका कार्यक्रम गर्न निषेध गरिएको छ । त्यस्तै, खुला स्थानमा मानिसहरू भेला, सम्मेलन, भिडभाड, सभा, जुलुस, जात्रा, महोत्सव, भोजभतेर आदि जस्ता गतिविधि समेत गर्न पाइने छैन । विवाह, व्रतबन्ध तथा सामूहिक रूपमा गरिने कार्यको हकमा बढीमा १० जनासम्म सहभागी भई जनस्वास्थ्य सुरक्षा मापदण्डको पूर्ण पालना हुने गरी गर्न सकिने तर होटेल तथा पार्टी प्यालेस प्रयोग गर्न नपाइने आदेशमा उल्लेख गरिएको छ ।
स्वास्थ्य सेवा, दूध डेरी तथा पेट्रोलियम पदार्थ लगायत अत्यावश्यक पसल व्यवसाय, उद्योग तथा कलकारखाना र सार्वजनिक तथा निजी निर्माण कार्य जनस्वास्थ्य सुरक्षा मापदण्डको पूर्ण पालना गरी निर्बाध रूपमा साबिकको जस्तै र अन्य पसल व्यवसाय बिहान ६ देखि साँझ ६ बजेसम्म मात्रै सञ्चालन गर्न सकिने छ । अत्यावश्यक कामले नेपाल प्रवेश गर्न चाहने व्यक्तिहरूका लागि कञ्चनपुरको पश्चिमी नाका गड्डाचौकी र दक्षिणी नाका गौरीफण्टाबाट मात्रै निर्धारित मापदण्ड पूरा गरी आवागमन सकिने तर अन्य खुला सिमानाको जुनसुकै बिन्दुबाट आवागमन नगर्न आदेश दिइएको छ । प्रमुख जिल्ला अधिकारीबाट जारी भएको आदेशको अवज्ञा गर्नेलाई कोभिड १९ सङ्कट व्यवस्थापन अध्यादेश २०७८ अनुसार कारबाही हुने बताइएको छ ।
