'नमुना युवा संसद्' सुदूरपश्चिमको मुख्यमन्त्रीमा सुरेन्द्र गिरी चयन हुनु भएको छ । युवाहरूलाई संसदीय अभ्यास गराउँदै आएको राष्ट्रिय युवा परिषद्ले यही असार २२ गतेदेखि आयोजना गरेको ‘नमुना युवा संसद्’ कार्यक्रमबाट मुख्यमन्त्री, प्रदेश प्रमुख, प्रदेश सभामुख, मन्त्री, सांसदको भूमिका निर्धारण गरिएको हो । तीन दिनसम्म नमुना युवा संसद्को प्रशिक्षण दिएर युवाहरूलाई अभ्यास गराइएको छ । कार्यक्रममा देशभरका सात वटै प्रदेशबाट २८४ जना १६ देखि २४ वर्ष उमेर समूहका युवाहरूको सहभागिता रहेको थियो ।
मुख्यमन्त्रीको भूमिकामा सुदूरपश्चिम प्रदेशबाट सुरेन्द्र गिरीले नमुना युवा सांसदबाट मुलुकको संसदीय परम्परा र अभ्यासबारे जान्ने मौका पाइएको बताउनुभयो । एउटा जनप्रतिनिधि बनिसकेपछि कानुनी ज्ञान, नीति निर्माणमा हुने लोकतान्त्रिक संस्कार, कानुन, संविधान, अनुशासन सिक्ने अवसर पाएकोमा राष्ट्रिय युवा परिषद्लाई धन्यवाद समेत व्यक्त गर्नु भएको छ ।
सुदूरपश्चिम प्रदेशबाट प्रदेश प्रमुखमा रुपा कठायत, सभामुखमा अर्जुन लुहार, उपसभामुखमा मेनका कुँवर, ज्येष्ठ सदस्यमा कमल न्यौपाने, आन्तरिक मामिला तथा कानुन मन्त्रीमा ध्रुवचन्द्र जोशी, सामाजिक विकास मन्त्रीमा निसम लोहार चयन हुनु भएको छ । यस्तै, आर्थिक मामिला मन्त्रीमा डम्बर सिंह कार्की, भौतिक पूर्वाधार तथा उद्योग मन्त्रीमा स्वस्तिका खत्री, प्रमुख सचेतकमा दीपा भण्डारी, मुख्य सचेतकमा वसन्ती सापकोटा र प्रमुख प्रतिपक्ष दलको नेतामा निशा भसाली चयन हुनु भएको छ ।
परिषद् सदस्य गोविन्द गिरीले युवालाई संसदीय प्रणालीबारे जानकारी दिन र नेतृत्व विकास गर्नका लागि युवा संसद् कार्यक्रम आयोजना गरिएको बताउनु भयो । उहाँका अनुसार हरेक वर्ष परिषद्ले युवालाई संसदीय अभ्यास गराउँदै आइरहेको छ । युवा प्रदेश सभा बैठकमा उपस्थित नमुना युवा सांसदले कोरोना भाइरस रोकथाम गरे मात्र जनजीविकालाई सहज बनाउन सकिने भन्दै कोरोना भाइरस विरुद्धको खोप प्रदेश सरकारले आफ्ना प्रदेशका नागरिकलाई उपलब्ध गराउनु पर्नेमा जोड दिनुभएको छ ।
