हरिश्चन्द्र बाग, कञ्चनपुर, २७ असार । कञ्चनपुर जिल्लालाई २०७८ चैत महिनाभित्र पूर्ण साक्षर घोषणा गरिने भएको छ । पूर्ण साक्षरताका लागि कञ्चनपुर जिल्लाका नौ वटै स्थानीय तहका जनप्रतिनिधि र सरोकारवालाहरूले आइतबार प्रतिबद्धता व्यक्त गर्नुभएको छ । स्थानीय तहका जनप्रतिनिधि, प्रमुख प्रशासकीय अधिकृत तथा शिक्षा शाखाका प्रतिनिधिहरूसँग आइतबार गरिएको छलफल तथा प्रतिबद्धता कार्यक्रममा फागुन महिना भित्र पालिकाहरूलाई साक्षर घोषणा गरिसक्ने जनाइएको छ । लालझाडी गाउँपालिकालाई भने यही असार २४ गते साक्षर गाउँपालिका घोषणा गरिसकिएको लालझाडी गाउँपालिकाका अध्यक्ष मदनसेन बडायकले बताउनु भयो ।
कञ्चनपुर जिल्लाका अरू ८ वटा पालिका अन्तर्गतका शिक्षा शाखाका प्रतिनिधिहरूले तथ्याङ्क सार्वजनिक गर्दै पूर्ण साक्षर पालिका घोषणाका लागि चाहिने सबै सूचक पूरा गरी आआफ्ना स्थानीय तहहरूलाई साक्षर घोषणा गर्ने तयारीमा रहेको बताउनु भएको छ । बेलडाँडी गाउँपालिका र शुक्लाफाँटा नगरपालिकालाई भदौ २३ गते साक्षर घोषणा गर्ने बताइएको छ । त्यस्तै बेलौरी नगरपालिका, पुनर्वास नगरपालिका, कृष्णपुर नगरपालिका, वेदकोट नगरपालिका, भीमदत्त नगरपालिका र दोधाराचाँदनी नगरपालिकालाई फागुन महिनाभित्र साक्षर घोषणा गर्ने प्रतिबद्धता जनाइएको छ । कोभिड १९ को महामारीका कारण अपेक्षाकृत उपलब्धि हासिल गर्न नसकिएको स्थानीय तहहरूले जनाएका छन् ।
जिल्ला पूर्ण साक्षरता बनाउन केही सूचक बनाइएको र सो सूचकका आधारमा साक्षर जिल्ला घोषणा गर्न सकिने शिक्षा विकास तथा समन्वय इकाई कञ्चनपुरका इकाई प्रमुख भरत बाबु सुवेदीले बताउनु भयो । सूचकमा राष्ट्रभाषा वा मातृभाषाका वर्णका अक्षरको पढाइ र लेखाइ गर्न सक्ने, राष्ट्रभाषा वा मातृभाषामा लेखिएको मूल्य सूचि र बिलको पढाइ, आफ्ना परिवारका सदस्यहरूको नाम, उमेर लेखाइ र पढाइ, मोबाइल र क्यालकुलेटरका अङ्क र अक्षर चिनेर प्रयोग गर्न जान्ने, शून्यदेखि नौ सम्मका अङ्कका अक्षर लेखाइ, १ देखि १ सय सम्म सङ्ख्या गणना, लेनदेनको हिसाब राख्ने लगायतका सूचक रहेका छन् । २०७६ साल भित्र देशका सबै जिल्ला नै पूर्ण साक्षर घोषणा गरी नेपाललाई नै साक्षर देश घोषणा गर्ने लक्ष्य नेपाल सरकारको रहे पनि कोभिड १९ को महामारीका कारण कार्यक्रम प्रभावित भएको थियो ।
जिल्ला समन्वय समिति कञ्चनपुरको सभा हलमा आइतबार इकाईले आयोजना गरेको छलफल तथा प्रतिबद्धता कार्यक्रममा समन्वय प्रमुख फैरू तामाङको अध्यक्षता तथा पुनर्वास नगरपालिकाका नगर प्रमुख जीवनराज थापा, बेलडाँडी गाउँपालिकाका अध्यक्ष धन बहादुर थापा क्षेत्री, लालझाडी गाउँपालिकाका अध्यक्ष मदनसेन बडायक, बेलौरी नगरपालिकाका उपप्रमुख चित्रकुमारी चौधरी, पुनर्वास नगरपालिकाका उपप्रमुख शारदा शर्मा बिष्ट, कृष्णपुर नगरपालिकाका उपप्रमुख रमिता राना बडायक, कञ्चनपुरका प्रमुख जिल्ला अधिकारी राम प्रसाद पाण्डे, जिल्ला समन्वय समिति कञ्चनपुरका समन्वय अधिकृत मोहन सुवेदी, शिक्षा विकास तथा समन्वय इकाई कञ्चनपुरका इकाई प्रमुख भरत बाबु सुवेदी, वेदकोट नगरपालिकाका प्रमुख प्रशासकीय अधिकृत पदमराज भट्ट तथा विभिन्न स्थानीय तहका शिक्षा शाखाका प्रमुख एवं प्रतिनिधि र सञ्चारकर्मीको समेत उपस्थिति रहेको थियो ।
