हरिश्चन्द्र बाग, कञ्चनपुर, १४ असार । विश्वभर फैलिँदै गइरहेको नयाँ भेरिअन्ट सहितको कोभिड १९ को सङ्क्रमण रोकथाम, नियन्त्रण, निदान तथा उपचारका लागि कञ्चनपुर जिल्लामा बैशाख १६ गतेदेखि जारी गरिएको निषेधाज्ञाको समय पुनः एक हप्ता थप गरी असार २१ गतेसम्म कायम गरिएको छ । जिल्ला कोभिड व्यवस्थापन केन्द्रको सोमबार बसेको बैठकबाट गरिएका निर्णयको आधारमा कोभिड १९ सङ्कट व्यवस्थापन अध्यादेश २०७८ को दफा ५ को उपदफा २ एवं स्थानीय प्रशासन ऐन २०२८ को दफा ६ को उपदफा ३ को अधिकार प्रयोग गरी असार २१ गते राति १२ बजेसम्म केही खुकुलो गरी निषेधाज्ञाको समय थप गरिएको कञ्चनपुरका प्रमुख जिल्ला अधिकारी राम कुमार महतोले जानकारी दिनुभयो ।
उहाँका अनुसार, स्वास्थ्य सेवा, दूध डेरी तथा पेट्रोलियम पदार्थ लगायत अत्यावश्यक पसल व्यवसाय निर्बाध रूपमा साबिकको जस्तै र अन्य पसल व्यवसाय बिहान ६ देखि साँझ ६ बजेसम्म मात्रै सञ्चालन गर्न सकिने छ । कञ्चनपुर जिल्लाभर सबै प्रकारका सवारी साधनहरू बिहान ६ देखि बेलुका ७ बजेसम्म जनस्वास्थ्य सुरक्षा मापदण्डको पालना गरी सञ्चालन गर्न सकिने तर जिल्ला बाहिरका जाने सवारी साधनहरूको हकमा जिल्ला प्रशासन कार्यालय कञ्चनपुरबाट पास लिनुपर्ने बताइएको छ । यद्यपि एम्बुलेन्स र मालवाहक साधन जस्ता अत्यावश्यक सेवामा प्रयोग हुने सवारी साधन भने निर्बाध रूपमा सञ्चालन हुने भन्ने आदेशमा उल्लेख गरिएको छ ।
उद्योग तथा कलकारखाना र सार्वजनिक तथा निजी निर्माण कार्य जनस्वास्थ्य सुरक्षा मापदण्डको पूर्ण पालना गरी सञ्चालन गर्न सकिने छ । शैक्षिक संस्थाहरूले भने भौतिक उपस्थितिमा पठनपाठन तथा परीक्षा सञ्चालन गर्न पाइने छैन । तर शैक्षिक गतिविधिहरू अनलाइन तथा भर्चुअल माध्यमबाट सञ्चालन गर्न सकिने छ । कुनै पनि सभा, सम्मेलन, गोष्ठी, सेमिनार लगायत भिडभाड हुने ठाउँ सबै बन्द गरिएको छ भने अत्यावश्यक कामकाज बाहेक घरबाहिर निस्कन र हिँडडुल गर्न तथा खुला ठाउँमा भेला, भिडभाड, सभा, जुलुस, जात्रा, महोत्सव, भोजभतेर आदि जस्ता गतिविधि गर्न पाइने छैन । विवाह तथा व्रतबन्धको हकमा बढीमा १० जनासम्म सहभागी भई जनस्वास्थ्य सुरक्षा मापदण्डको पूर्ण पालना हुने गरी गर्न सकिने तर होटेल तथा पार्टी प्यालेस प्रयोग गर्न नपाइने भनिएको छ ।
अत्यावश्यक कामले नेपाल प्रवेश गर्न चाहने व्यक्तिहरूका लागि कञ्चनपुरको पश्चिमी नाका गड्डाचौकी र दक्षिणी नाका गौरीफण्टाबाट मात्रै निर्धारित मापदण्ड पूरा गरी आवागमन सकिने तर अन्य खुला सिमानाको जुनसुकै बिन्दुबाट आवागमन नगर्न आदेश दिइएको छ । सार्वजनिक सेवा प्रवाह गर्ने सबै सरकारी तथा सार्वजनिक कार्यालयहरू, बैङ्क तथा वित्तीय संस्था, गैरसरकारी संघसंस्था तथा सहकारी लगायत अन्य निकायहरूले स्वास्थ्य सुरक्षा मापदण्ड पूरा गर्ने गरी आलोपालो वा बार प्रणाली वा टोकन प्रणाली वा कोटा निर्धारण जस्ता उपयुक्त विधि अपनाई सो को पूर्व सूचना गरी सेवा प्रवाह गर्नुपर्ने छ । प्रमुख जिल्ला अधिकारीबाट जारी भएको आदेशको अवज्ञा गर्नेलाई कोभिड १९ सङ्कट व्यवस्थापन अध्यादेश २०७८ अनुसार कारबाही हुने बताइएको छ ।
