हरिश्चन्द्र बाग, कञ्चनपुर । वातावरण संरक्षण तथा हरित जलवायु कोष स्थापनाका लागि सरोकारवालाहरूले जोड दिएका छन् । विश्व वातावरण दिवस २०२१ को अवसरमा कञ्चनपुरमा भर्चुअल माध्यमबाट आयोजित अन्तरक्रिया कार्यक्रमका वक्ताहरूले वातावरण संरक्षण तथा हरित जलवायु कोष स्थापनामा जोड दिएका हुन् । “नयाँ सोच र सिर्जना, प्राकृतिक प्रणालीको पुनर्स्थापना” भन्ने नारा सहित शनिबार मनाइएको विश्व वातावरण दिवस २०२१ को अवसरमा एनएनएसडब्ल्युएले पालिका स्तरीय अन्तरक्रिया कार्यक्रम आयोजना गरेको थियो । कार्यक्रमको सभाध्यक्षता समेत गरिरहनु भएका एनएनएसडब्ल्युएका निमित्त कार्यकारी निर्देशक विनोद विक्रम जैरुले वातावरण संरक्षण तथा हरित जलवायु कोष स्थापनाका लागि स्थानीय तहहरू थप सक्रिय हुनुपर्नेमा जोड दिनुभयो । आफ्नो पालिकामा वातावरण संरक्षण तथा हरित जलवायु कोष स्थापना गरी पालिकाहरूसँग सहकार्य र समन्वय गर्न पालिकामा आउने सबै संघसंस्थाहरुलाई त्यस कोषमा सहयोग गरेपछि मात्रै अन्य कार्यक्रमका लागि प्रस्ताव स्वीकृत गर्ने नीति तथा योजना पालिकाहरूले बनाउनु पर्ने उहाँले सुझाव दिनुभयो ।
सोही कार्यक्रमलाई सम्बोधन गर्दै प्रमुख अतिथि समेत रहनु भएका बेलौरी नगरपालिकाका नगर प्रमुख पोतिलाल चौधरीले वातावरण संरक्षणका लागि सबै पक्षको सक्रियता आवश्यक रहेको औँल्याउनु भयो । बेलौरी नगरपालिकाले वातावरण संरक्षणका निम्ति विभिन्न संघसंस्था तथा बनहरूसँग समन्वय र सहकार्य गर्दै वृक्षारोपण, बिरुवा उत्पादन तथा वितरण, जनचेतनामूलक कार्यक्रम गर्दै आएको नगर प्रमुख चौधरीको दाबी छ । त्यस्तै, विशिष्ट अतिथिको रूपमा उपस्थित लालझाडी गाउँपालिकाका अध्यक्ष मदनसेनं बडायकले वातावरण संरक्षण तथा हरित जलवायु कोष स्थापनाका सन्दर्भमा गाउँपालिकाले गरिरहेका गतिविधिहरूको बारेमा जानकारी गराउँदै बढी अक्सिजन दिने बोट बिरुवाहरू रोप्न आवश्यक रहेको उल्लेख गर्नुभयो । अहिले सिसौँ, लिप्टिस, जामुन, सगुन, डालेघाँसहरु, फलफूलका बोटबिरुवा रोप्ने क्रमले मात्रै प्राथमिकता पाएको बताउँदै उहाँले बर, पिपल, रक्त चन्दन, साल लगायतका बोटबिरुवा पनि रोप्नुपर्ने आवश्यकता औँल्याउनु भयो ।
कार्यक्रममा कुण्डा सव डिभिजन वन कार्यालयका सहायक वन अधिकृत दिनेश कुमार यादवले बन तथा वातावरण संरक्षणमा सबैको हातेमालो अनिवार्य रहनु पर्नेमा जोड दिनुभयो । गत विगतका वर्षहरू झैँ आउँदो असार महिनामा वृक्षारोपणका लागि बिरुवा वितरण गरिने समेत उहाँले जानकारी दिनुभयो । कञ्चनपुरको दक्षिणी क्षेत्रमा बन तथा वन्यजन्तुको चोरी निकासी तथा तस्करी केही कम भएको देखिए पनि कञ्चनपुरको मध्य भागमा यस किसिमका अवैध गतिविधि अत्यधिक भइरहेको उहाँले बताउनु भयो । लालझाडी गाउँपालिका शिक्षा शाखाका प्रमुख सिद्ध राज भट्टले वातावरण संरक्षणका सन्दर्भमा शाखाबाट तयार गरिएका नीति तथा योजना र शाखाले गरिरहेका गतिविधिको बारेमा कार्यक्रममा जानकारी गराउनु भएको थियो । डिसिए नेपालको उत्थान परियोजनाका संयोजक जगदीश भट्टले कार्यक्रमको उद्देश्य माथि प्रकाश पार्नुभएको थियो ।
त्यस्तै, वातावरण संरक्षण तथा हरित जलवायु कोष स्थापना विषयमा प्रकृति स्रोत केन्द्रका कार्यक्रम निर्देशक प्रवीनमान सिंहले प्रस्तुतीकरण गर्नुभएको थियो । एनएनएसडब्ल्युएको सफल परियोजनाका संयोजक राजकुमार सुनारले सहजीकरण गर्नुभएको उक्त कार्यक्रममा स्वागत मन्तव्य एनएनएसडब्ल्युएका फाउन्ड राइजिङ अफिसर टेक बहादुर बुढाले राख्नु भएको थियो । कार्यक्रममा डिसिए नेपालका कार्यक्रम प्रमुख सम्झना बिष्ट, लालझाडी गाउँपालिकाका प्रमुख प्रशासकीय अधिकृत महेन्द्र सिंह रावल, डिसिए नेपालका जीविकोपार्जन व्यवस्थापक रिगेन्द्र खड्का, लिवर्डका कार्यक्रम संयोजक लक्ष्मी दत्त जोशी र वरिष्ठ कार्यक्रम व्यवस्थापक लक्ष्मण खत्री, बेलौरी र लालझाडीका विभिन्न वडाका वडाध्यक्षहरू, विषयगत शाखाका प्रमुख तथा प्रतिनिधिहरू, बहुसरोकारवाल मञ्चका सदस्यहरू, पत्रकारहरू तथा एनएनएसडब्ल्युएका कार्यपालिका सदस्य तथा कर्मचारीहरूको पनि उपस्थिति रहेको थियो ।
