हरिश्चन्द्र बाग, कञ्चनपुर, २० जेठ । डिभिजन बन कार्यालय कञ्चनपुरले बन क्षेत्रमा निगरानी बढाउनका लागि ड्रोन क्यामेराबाट गस्ती गर्ने योजना बनाएको छ । कोभिडको महामारीको समयमा सम्भावित जोखिम न्यूनीकरण गर्न र बन तथा वन्यजन्तुको संरक्षणका लागि ड्रोन क्यामेराबाट गस्ती गर्ने योजना अघि सारिएको डिभिजन बन कार्यालय कञ्चनपुरका प्रमुख अजय विक्रम मानन्धरले बताउनु भयो । बन र वन्यजन्तुको चोरी निकासी तथा तस्करी रोक्नका लागि अहिले भाडामा लिएर भएपनि ड्रोन गस्ती गरिने र पछि त्यसको प्रभावकारिताका आधारमा आवश्यक सङ्ख्यामा डिभिजन बन कार्यालय आफैले ड्रोन क्यामेरा खरिद गर्ने योजनामा डिभिजन बन कार्यालय कञ्चनपुर रहेको छ ।
हालसम्म पैदल, साइकल, घोडा, हात्ती तथा अन्य यातायातका साधनबाट नै गस्ती गरिएको भएपनि त्यसका अतिरिक्त अब प्रविधिको समेत प्रयोग गरी गस्ती गर्ने नौलो अभ्यासका रूपमा डिभिजन बन कार्यालय कञ्चनपुरले योजना अघि सारेको प्रमुख मानन्धरको भनाइ छ । दिवा समयमा ड्रोन क्यामेराबाट गरिने गस्ती चोरी निकासी तथा तस्करी नियन्त्रणका लागि निक्कै प्रभावकारी भएको उहाँले बताउनु भयो । सामुदायिक वन, कर्मचारी, सुरक्षा निकाय सबैको सहयोगमा हालसम्म अतिक्रमण, चोरी निकासी तथा तस्करी धेरै हदसम्म नियन्त्रण गरिए पनि चुरे क्षेत्रसम्म बाटोको असुविधा, प्रतिकुल मौसम तथा अनेक बाधा व्यवधानका कारण अवैध गतिविधि नियन्त्रणमा चुनौती देखिएकोले ड्रोन क्यामेराबाट गस्ती गर्दा सहज हुने उहाँको विश्वास छ ।
वन्यजन्तु संरक्षणका लागि वन्यजन्तु मैत्री संरचना निर्माणमा जोड ।।
यसैबिच, वन्यजन्तु संरक्षणका लागि वन्यजन्तु मैत्री संरचना निर्माणमा कञ्चनपुरका सरोकारवाला पक्षले जोड दिएका छन् । डिभिजन वन कार्यालय कञ्चनपुरले बुधबार कृष्णपुर स्थित हरियाली सामुदायिक वनको सभाहलमा आयोजना गरेको वन्यजन्तु मैत्री संरचना निर्माणका विषयमा कञ्चनपुरका सञ्चारकर्मीहरू र सरोकारवाला कार्यालयका इन्जिनियर तथा प्रतिनिधिहरूसँगको अन्तरक्रिया कार्यक्रममा वन्यजन्तु मैत्री संरचना निर्माणमा जोड दिइएको छ ।
वन क्षेत्र भित्र बनाइने सडक तथा नहर जस्ता विभिन्न संरचनाहरूलाई वन्यजन्तु मैत्री बनाउन नसके मानव र वन्यजन्तु बीच द्वन्द्व र दुर्घटना समेत बढ्दै जाने हुँदा आगामी दिनमा यस प्रकारका भौतिक संरचना निर्माणका क्रममा सबै पक्षले वन्यजन्तुको संरक्षण र अधिकारको विषयलाई समेत आत्मसात् गर्न आवश्यक रहेकोमा डिभिजन वन कार्यालय कञ्चनपुरका प्रमुख अजय विक्रम मानन्धरले जोड दिनुभयो ।
शुक्लाफाँटा राष्ट्रिय निकुञ्जका प्रमुख संरक्षण अधिकृत दिलबहादुर पुर्जापुनले वन्यजन्तु मैत्री संरचना निर्माण हुँदा वन्यजन्तु र मानव बीच हुने द्वन्द्व एवं दुर्घटनामा कमी आउने बताउनु भयो । उहाँले वन्यजन्तुहरूलाई सुरक्षित महसुस हुने गरी संरचना निर्माण गर्नुपर्नेमा जोड दिनुभयो । त्यस्तै, महाकाली सिँचाई तेस्रो चरण आयोजना कार्यालयका प्रमुख रण बहादुर बमले तेस्रो चरणको काममा वन क्षेत्रमा वन्यजन्तु मैत्री संरचना निर्माण भइरहेको जानकारी दिनुभयो ।
