हरिश्चन्द्र बाग, कञ्चनपुर, २१ बैशाख । विश्वभर फैलिँदै गइरहेको नयाँ भेरियन्ट सहितको कोभिड १९ को सङ्क्रमण कञ्चनपुरमा समेत उच्च दरमा बढ्दो क्रममा रहेको र उक्त महामारीको सङ्क्रमण जिल्लाको दक्षिणी क्षेत्रमा समेत दिनानुदिन बढिरहेको अवस्था छ । यस समयमा वैधानिक नाकाका रूपमा रहेका कञ्चनपुरको गड्डाचौकी र गौरीफण्टा बाहेक दर्जनौँ अवैध नाकाहरू भएर पनि नेपाल–भारत आवागमनको क्रम जारी रहेकोले कोभिड १९ सङ्क्रमणको जोखिम थप बढिरहेको छ । भारतबाट नेपाल आउने र नेपालबाट भारत जाने सर्वसाधारण नागरिकहरू मात्रै अवैध नाका प्रयोग गर्दैनन्, सबैभन्दा बढी त नेपाल भारत सीमा क्षेत्रका अवैध बाटो प्रयोग गरी तस्करहरूको समूहले सामान ओसारपसार समेत गर्ने गरेको पाइन्छ ।
यसका अतिरिक्त कञ्चनपुरको दक्षिणी क्षेत्रका यिनै अवैध बाटो भएर प्रतिबन्धित माछा, कुखुरा, अण्डा, पेय पदार्थ तथा मलखाद समेत दैनिक रूपमा भित्र्याइने गरेको पाइन्छ । यही बैशाख १६ गतेका दिन बेलौरी नगरपालिका वडा नम्बर २ टेडुवाबाट १ सय ४८ कट्टा डिएपी मलखाद बरामद गरेको इलाका प्रहरी कार्यालय बेलौरीको टोलीले यही बैशाख १८ गते बिहान ६ देखि ७ बजेसम्म १ घण्टाको समयमा मात्रै पनि बेलौरी नगरपालिका वडा नम्बर ४ स्थित सीमा नजिकबाट ३६ हजार मूल्य बराबरका अवैध ब्रोइलर कुखुरा र ६ हजार मूल्य बराबरका माछा तथा बेलौरी नगरपालिका वडा नम्बर २ स्थित सीमा नाका नजिकबाट ९ हजार ४ सय ५० मूल्य बराबरको पेय पदार्थ बरामद गरी नष्ट गरेको थियो ।
सीमा क्षेत्रमा सशस्त्र प्रहरी खटिए पनि अवैध क्रियाकलापहरू भने पूर्ण रूपले रोकिन सकेका छैनन् । बेलाबेलामा नेपाल प्रहरी समेत सीमा नाकाहरूमा निगरानी गरिरहेको दाबी गर्दै आएको छ । तर पनि अवैध बाटो भएर मालसामान ओसारपसार गर्ने कार्य र सीमा वारपार गर्ने व्यक्तिहरूको सङ्ख्या भने रोकिएको छैन । सीमा क्षेत्रहरूमा सुरक्षा निकायका प्रतिनिधिहरूकै मिलेमतोमा अवैध क्रियाकलाप हुने गरेको कतिपय सर्वसाधारणहरुले आरोप लगाउने गरेका छन् । यस्ता अवैध क्रियाकलाप कञ्चनपुर जिल्लाको दक्षिणी क्षेत्रका सीमा नाकाहरूमा अत्यधिक मात्रामा भइरहेको पाइन्छ । यी गतिविधि तत्कालै नरोकिए कोभिड १९ को सङ्क्रमण विकराल रूपले फैलिने देखिन्छ । प्रशासनले निषेधाज्ञा गरे पनि तस्करी भने नरोकिएको प्रति यहाँका सचेत युवाहरूले चिन्ता व्यक्त गरेका छन् ।
गत हप्ता मात्रै कञ्चनपुर जिल्लाको दक्षिणी क्षेत्रबाट सीमामा हुने अवैध आवागमन रोक्न पुनर्वास नगरपालिकाले चाँसो दिई सर्वपक्षीय बैठकबाटै निर्णय गरेको तर पुनर्वाससँगै जोडिएको बेलौरी नगरपालिका भने मुख्दर्शक बनेको भन्ने समाचार विभिन्न सञ्चारमाध्यममा प्रकाशन तथा प्रसारण भइसकेपछि यही बैशाख १५ गतेका दिन बेलौरी नगरपालिकाले समेत सर्वपक्षीय बैठक बोलाएको थियो । कोभिड १९ को रोकथाम सम्बन्धी सर्वपक्षीय बैठकले गरेका ५ वटा निर्णयहरू मध्ये दोस्रो निर्णयमा नगर क्षेत्रमा रहेका सबै प्रकारका खुला सीमा नाकाबाट हुने अवैध आवागमनलाई पूर्ण रूपमा रोक लगाउने निर्णय गरेको थियो । कोभिड १९ को रोकथाम सम्बन्धी सर्वपक्षीय बैठकले उक्त निर्णय गरे पनि त्यसको कार्यान्वयनमा भने बेलौरी नगरपालिकाले चाँसो दिएको पाइँदैन ।
यस्ता छन् बैशाख १५ गतेका दिन बसेको सर्वपक्षीय बैठकका निर्णयहरू :
